Russia-in India nena an inkara US thu sawi chhang

Russia chuan India-in an tuialhthei lei chungchanga Washington thil sawi chu chhangin New Delhi-in a lak luh thinah a kal dan a thlak ngawt chhan tur a awm lo niin a sawi.
Kar tina thuthar lakhawmtute a kawmnah Russian foreign ministry thupuangtu, Maria Zakharova-i chuan India-in Russian hydrocarbon a leisak thin chu ‘ram pahnih an hlawkpui ve ve leh khawvel puma energy sumdawnna tinghettu’ a nih zawk thu a sawi.
“India hian Russian hydrocarbon a lei chungchangah hian thu dang a neih ngawt chhan tur engmah kan hre ve lo,” a ti a. “US President Donald Trump-a’n a sawiah khan thil thar a awm lo va, US Secretary of State Marco Rubio-a sawiah pawh engmah a awm lo bawk, ram dang daih dikna chanvo a sawisak ve mai a ni,” a ti.
Russia-in hetiang a sawi hma hian Washington chuan New Delhi-in Russian tuialhthei a lak luh thin a titawp dawn tih a lo sawi tawh a. US Secretary of State Rubio-a pawhin kar hmasa khan India-in Russian tuialhthei a lei tawh danw lo tih a sawi leh bawk.
February thla tir khan India nena insumdawn tawnna tura inremna tur an tifel a, US President Donald Trump-a chuan India hian Russia atangin tuialhthei a lei ngai tawh dawn lo niin a sawi a ni.
A hnuah Trump-a hi Prime Minister Narendra Modi-a nen phone-in an inbe zui a. A hnuah US-in India bungrua a lak luha chhiah a lak thin 50% chu 18%-ah tihhniam a nih thu an puang zui ve ve bawk a. Chhiah laksak tihhniamah hian nikum August thlaa India-in Russian tuialhthei a leisak avanga hrem nana chhiah 25% a lak a tihtawp pawh a tel.
India chuan Washington-in Russian tuialhthei la lut tawh lo tura a sawina hi a la sawi ve ngai miah lo va, a pha lem lo bawk a. New Delhi hian a hma atang tawhin ram dang atanga energy a mamawh a lak luh chu ‘ram tana tha tur’ ang zelin a kalpui dawn tih a sawi tawh thin thung a, a bak a la sawi lo.
Russia hian a hma khan US hi India leh ram dangten an tuialhthei an leisak tur dan tumah a lo puh tawh thin a, Washington hian hmaraw chi hrang hrang hmangin chhiah sang a laksak a, a hrek a, khuahkhirhna a kalpui thin bawk niin a sawi a ni.
Zakharova-i hian Ukraine an rûn mek leh remna zawnga an inbiakna chungchang pawh sawiin Kyiv-in a thawhpui European ramte chu muanna a awmna tur ngaihsak lo leh tikhawlhkhamtuah a puh.