Russia-in inkahhai kalpui tum lo

Russia-in inkahhai kalpui tum lo
Russia chuan Ukraine nena tuipuia inkahhai tura an inremna chu khawthlang ramten an ram an hrekna thenkhat an hlih hunah chauh an kalpui dawn tih a sawi.
US-in ram pahnihte a hranga a kawmnaah Black Sea-a inbeih tawh rih loh an remti ve ve tih a puan hnu lawkah Kremlin hian Russian bank-te hrekna hlih a nih hunah chauh a taka kalpui a nih tur thu a sawi ve nghal.
An phut zingah hian sorkar agricultural bank Rosselkhozbank hrekna hlih leh Swift international payment system an hman leh theih a tel.
Thawhlehni zan zankhua khan Moscow hian drone hmangin lawngchawlhna khawpui, Mykolaiv an bei niin Ukrainian thuneituten an sawi a. President Volodymyr Zelensky-a chuan beihna an tawh hi Russia-in muanna an duh lohzia ‘lantirna chiang tak’ niin a sawi.
Russia-in Ukraine a rûn atang khan EU leh an thawhpui ram tam tak chuan Russian financial institution eng emaw zat chu Swift hmang thei lo turin a hrek nghal.
Russian company-ten awlsam taka Swift hmanga sum an thawn theih loh nan leh hei hi an energy hlu tak leh lo lam thil an thawn chhuah zung zung theih loh nana an tih a ni.
He hrekna hlip tur hian EU pawmpuina a ngai a, tun hnaia European ramten Kyiv an thlawpzia an tihlan dan atang chuan an pawm mai hmel loh hle.
European Commission thupuangtu chuan Ukraine atanga Russian sipai zawng zawng lak chhuah chu hrekna hlih emaw, ennawn emaw theihna tura an duh a ni tih a sawi.
Thawhlehni khan US President Donald Trump-a chuan Russia hian indo titawp turin thil a tikhawtlai thei tih a sawi ve bawk.
“Russia hian tawp pawh a duh a; mahse, thil a tikhawtlai ve thei tho a ni,” tiin Newsmax-in an kawmnaah a sawi.
Tuipuia inkahhai hi US-in ni thum chhung Saudi Arabia-a inbiakna a kalpui hnua puan a ni.
Hetih lai hian Kyiv leh Moscow hian inremna hi puang chiangin an hman tan hun tur leh eng ang taka kalpui tur nge tih an sawi.
Zelensky-a chuan a taka kalpui turin hrekna hlih a tulna a hre lo va, hman tan nghal mai theih niin a sawi a. Kremlin chuan inremna chu ‘a phuah kual’ vel mai mai niin a sawi.
Black Sea hi indona kal mekah hian ngaih pawimawh ber a ni ngai lem lo.
Indo tirh lamah khan Ukraine hian Crimea lawngchawlhnaa Russia lawng rual an kah chhiat thu a sawi a. Nikum nipui lai khan Russian lawng 28 a kap chhe bawk.
Russian lawng rual hi an ram chhim leh khawchhak lam leh Abkhazian lawngchawlhnaah an tlanchhia a, hei vang hian Ukraine chuan indo hma ang thawthangin thil a thawn chhuah theih phah.
Kum 2022 khan Black Sea Grain Initiative siam niin Ukraine-ah lawng a lutin a chhuah theih phah a, UN thuneitute chuan Russia pawhin ei tur leh lei tihthatna a thawn chhuah theih phah niin an sawi bawk.
Russia hi kum 2023 nipui khan he inremna atang hian a inhnukdawk a, suma an hreknain an thil thawn a tibuai niin a sawi a. Heta tang hian Ukraine pan lawngte chu an sipaiten an bitum theih phah thei niin a ngaih theih.
Black Sea hi Ukraine chhim leh Russia khawthlanga awm niin Romania, Bulgaria, Turkey leh Georgia ten an ri a. Crimea telin Russian awp Ukraine ten an ri bawk.