Russia-in ni khata Ukraine a beih nasat ber tum thlen

Russia chuan indo tan atanga darkar 24 chhunga Ukraine a beih nasat ber tum thlentirin khawpui hrang hrangah drone 948 an thlawh luhtir.
Thawhlehni chawhnu ringawtah khan drone 400 chuang kah a ni a, chhun lama beihna an thlen ngai loh ang takin an che a, Ukraine chhim lama hmun hrang hrangah thi leh hliam an awm nual.
Chhuna beihna hi a hma zan zankhuaa an chetna avanga mi panga vel an thih hnua an chhunzawmna a ni.
Lviv-ah chuan Mayor Andriy Sadovyi-a chuan mi 22-in hliam an tuar tih sawiin an pun a rin thu a sawi bawk.
Region hotu, Maksym Kozytskyi-a chuan kum zabi 16-naa Unesco hmun, Bernardine monastery a chhiat thu a sawi a. Lviv thuneituten video an tihchhuahah pawh monastery bul in chung atanga kangmei chhuak a lang.
Khawthlang lam khawpui dang pathum – Ivano-Frankivsk, Vinnytsia leh Ternopil te pawh beih a ni.
Ivano-Frankivsk region hotu, Svitlana Onyshchuk chuan mi pahnih an thi tih a sawi a. Mi pali an hliam a, an zingah hian naupang kum ruk mi pawh a tel a. Khawpui chhunga building hrang hrang bakah nau neihna damdawi in pawh a chhia.
Vinnytsia-ah Thawhlehni chawhnu khan mi pakhat a thi a, mi 11 an hliam bawk.
Kum li chhung indona a awm tawh avangin Ukraine-a kil tin khawih loh a awm tawh lo va; hetih rual hian khawchhak lama Russia ramri hnaih hmun dangte aiin khawthlang lam hian an la tuar tam lo hle.
Ukrainian Air Force thupuangtu, Yurii Ihnat chuan Thawhlehni tlai khan Ukraine boruak hmar lam atangin ‘drone tam tak’ a lut tih a sawi a, ‘hlawm lian takin an kal’ tih a sawi.
“Chhun lama beihna hi zan aiin a nasa zawk a… darkar 24 chhunga beihpui thlakna lian ber tiin sawi theih,” a ti.
Moscow hian Ukraine a beih tan hnu kum liah pawh indo chhunzawm zel a ni a, ni tin deuhthaw Ukraine-a khawpui hrang hrang a bei thin.
Thawhlehni vek khan Russia-a Kursk region governor chuan Ukraine drone-in agricultural enterprise a beih avangin mi pakhat a thi a, mi 13-in hliam an tuar tih a sawi ve bawk.
February thla tawp lama US leh Israel tangdunin Iran an beih atang khan US hmalaknaa remna zawnga inbiakna chu a tawp rih mek.