Russia-in Ukrainian bazar a beihnaah mi panga thi

Russia-in Ukrainian bazar a beihnaah mi panga thi
Russia-in drone hmanga Ukraine chhim lama bazar a fuhah mi panga an thi a, mi dang 21-in hliam an tuar bawk a, an zingah hian hmeichhe naupang kum 14 mi pawh a tel niin prosecutor general office chuan a sawi.
Nikopol khaw beihna hi Inrinni zing dar 09:50 (India-a chhun dar 12.20)-a thleng a ni a, Dnipro lui kam, February, 2022-a Russia-in Ukraine a beih hnuah a luahsak a mi a ni.
Region prosecutor-in thlalak a tihchhuahah chuan bazar luhka vel chu a chhe nasa hle a, thir leh darkthlalang keh a awm nual bawk.
Zirtawpni khan drone leh missile hmanga Ukraine pum beihnaah civil mi 15 vel an lo thi tawh bawk.
Hetihlai hian Ukraine pawhin Zirtawpni zankhua khan Russia chhim lama Taganrog chu drone leh missile hmangin a bei a, mi pakhat a thi a, paliin hliam na tak an tuar niin Russia chuan a sawi.
Ukraine-a Nikopol hi kah a ni fo tawh a, khuaa cheng mi 1,00,000 zinga a zahve vel chu hun rei tak kalta atanga himna zawngin an lo chhuak tawh.
Inrinni tuka beihna erawh zing mi hulum lai, hmun lun lai niin thi leh hliam pawh an tam phah.
He hmun vek hi kah nawn lehnaah mi pahnih an hliam niin prosecutor chuan a sawi a, heng thil thleng hi indonaa dan bawhchhiatna anga chhui mek a ni tih a sawi.
Russia hian zankhuain Ukraine hi drone 300 velin a kap tih Ukrainian air force chuan a sawi a, hmarchhaka Kharkiv leh hmar lama Sumy-ah pawh thi leh hliam an awm nia sawi a ni.
Hetihlai hian Moscow pawhin Ukrainian drone 85 an kap thla tih a sawi.
Rostov region Governor Yuri Slyusar-a chuan Taganrog beihna avangin logistics company pakhat hmunah kangmei a chhuak nasa niin a sawi.
Kyiv chuan Russian sipai industrial complex-in a hman nia an sawi factory pahnih beih a nih thu an sawi bawk.
Defence thuneitu chuan Togliatti-a plant pakhat, synthetic rubber leh petrochemical raw material siamna hmun chu ‘nasa taka beih’ a nih thu a sawi.
A hnuah Ukraine Security Service chuan drone hmanga beih a nih avangin Ukraine-a Luhansk biala Russia-in a luah, Alchevsk metallurgical plant-ah hna chawlhsan a nih thu a sawi.
President Volodymyr Zelensky chuan Russia chu Easter chawlh hmang turin inkahhai a rawt a, Moscow-in a ngaihsak lo thung a. Ni tin lianthama a beih thin chu a tipung zel zawk.
February, 2023 atanga Russia-in Ukraine a rûn hian kum thum indona a tling ta a, inkahhai leh inremna siam tumin hmalak a ni fo tawh thin a. Tun hnaiah phei chuan US President Donald Trump-a chuan hma a la nasain ram pahnih aiawhte pawh a be fo tawh thin a; mahse, a hlawhtlinna tak an la sawi chhuak thei lo zel rih a ni.