Russia-India-China tanrualna din tumna nei lo – India

Russia-India-China tanrualna din tumna nei lo – India
China leh Russia ram atanga Russia-India-China (RIC) din tuma nawrna awm mah se India chuan chumi tipuitling tura thutkhawm neih tumna engmah a nei lo tih a sawi.
“RIC siam tumna hi tunah chuan a awm lo va, inhmu khawm tura tuahmanna pawh a awm rih lo,” tiin Indian external affairs ministry chuan a sawi.
MEA hian kar tina thuthar lakhawmtute an kawmna thinah RIC hi din thar leh tumna a awm loh thu Ningani khan a sawi a. Thupuangtu, Randhir Jaiswal-a chuan, “He thil hi ram pathumin khawvel huap leh anmahni inkar thil an kalpui leh an indawrna a ni a. Hetiang atana thutkhawm leh hmalakna a awm chuan a ni ruat a ni ang a, in hre ngei ang,” tiin thuthar lakhawmtute hnenah a sawi.
Ram pathum tanhona hi khawthlang ram chakten khawvel an thunun lutuk tur do letna tura ruahman thin a ni a. Indian foreign ministry-in hetiang thuthar a puan hi thla kal taa Russian Foreign Minister Sergey Lavrov-a’n din tura ruahmanna kalpui leh tan a ni tih a sawi hnua a sawi a ni.
Lavrov-a hian June thla khan, “Russian prime minister hlui, Yevgeny Primakov-a’n kum tam tak kal taa a lo buaipui tawh, Russia, India, China thawhhona siam hi chhunzawm leh mek a ni a. Vawi 20 chuang minister level-a thutkhawm tawh a ni a, foreign policy chief-te chauh ni lovin ram pathuma economic, sumdawnna leh sum lam khawih thinte pawh an tel thin a ni,” a ti.
China pawhin Russia-in RIC siam a duhna hi a thlawp a, ram pathum thawhhona hi anmahni tan mai ni lo, khawvela himna leh nghehna tha a awm theihna tura tangkai a ni dawn niin a sawi a ni.
Russian news portal Izvestia chuan Ningani khan Russian Deputy Foreign Minister Andrei Rudenko-a’n Moscow chuan RIC siam tumna a awm tih a sawi niin a tar lang a, Beijing leh New Delhi pawh biak a ni dawn tih a sawi niin an tar lang.
“He thil hi ram pahnih hnenah hian rawtna kan thlen a. Ram pathum thawhhona siam hi kan ngaihven leh duh a ni a, BRICS dintute an nih piah lamah an pathum hian kan thawhpui tha tak ve ve an ni,” tiin Rudenko-a hian a sawi niin an tar lang.
“He thil tel lo hi chuan ka ngaihdanah chuan thil a kim lo va. Hei vang tak hian ram pahnihte pawh hian RIC dinna tura inrawn hi an duh ka beisei a, tanghova kil thuma thawhhona neih hian sang tak a thleng dawn a ni,” a ti a ni.
RIC siam tum hian a hma khan thil lo kalpui a ni tawh a; mahse, coronavirus hripui leng leng kum 2020-a Ladakh khawchhak lama India-China sipai intihbuaina chhuak khan thil a tibuai.
India hi Beijing lian chak tak dang tura ding, Quad an tih, US, India, Japan leh Australia thawhhonaa tel lai a ni a. Heti chung hian Russia leh China hian RIC siam tum hian nasa takin an nawr ve reng tho a ni.