September 14, 2022 khan Ukrainian tena an beih let avangin Russian sipaite chu Kharkiv atanga inhnukdawk lo thei lova siam an nih laiin mi pakhat Russian Lung Ina tangte hnena thusawi lai video thehdarh chiam a ni a.
-- Advertisement --
“Private military company aiawh ka ni a. A hming pawh in hre tawh mai thei, PMC Wagner tih a nia” tiin pa sang tak lukawlh tul chuan lungin tang amah hual tiau te hnenah a sawi bauh bauh a.
He video hi low-quality mobile a lak niin a hnu lawkah Russian opposition leader Lung Ina khung mek Alexei Navalny thuihhruaite chuan an thehdarh zui a ni.
Video-a langa thusawitu chu Yevgeny Prigozhin, Russian tycoon, Kremlin nena inzawmna thuk tak nei a ni a. A mission chu : Ukraine indonaa Russia tana bei tura Wagner sipai tur lung in tang te lak chu a ni.
A hma zawng chuan Prigozhin chuan Wagner group te nena inzawmna nei lo ang hlirin a insawi a; mahse, phat theih a ni ta lo. Video a sawmna a siam lai ngaithlatu lung in tangte chu kum 22 atanga 50 inkar te an ni hlawm a. Wagner sipaia an tang a nih chuan thlaruk hnuah an thubuai chinfel vek a ni ang a, indonaa nunna an chan a nih pawhin hero taka vuiliam a tiam bawk.
“Lung In atanga lachhuak thei che u midang hriat i nei em?” tiin lung in tang te chu a zawt a. “Midang pahnih an awm – Allah leh pathian – Mahse, anni pawhin kuang hmang bakin an la chhuak thei dawn lo che u a. Kei chuan damin ka lachhuak thei che u a ni,” tiin a sawi bawk.
Russian law chuan lung in tang te chu military service peka lakchhuah a remti hauh lo. Federal penitenriary Service, federal authority of prison and detention facility chu Russia a thilithei em em Ministry of Justice hnuaia awm a ni a. Mahse, sorkar bureaucracy chu Prigozhin tan chuan a inkhar ve lo.
Kha video a lar vak hnu khan Wagner te chu Ukraine a Russia war ah nasa zawkin an inrawlh zui bawk a. January thlaa Russian sipai tena Donetsk a Bakhmut dai pawna salt mine city Soledar an lak khan a sulsutu ber te chu Wagner te an ni. Bakhmut-ah hian thla sarih vel zet chu inkahna leh inbeihna nasa tak awm tawhin chuta sulstu ber te chu Wagner te an ni a. Prigozhin hian thawhpui hrawl tak tak neiin chung zingah chuan Ramzan Kadyrov of Chechnya te pawh an tel a. Tun hma chuan langsar lo taka chetla thin niin tunah erawh a langsar ta hle.
Kum 1961 khan Leningrad (St. Petersburg), Tsarist capital hluiah a piang a. Prigozhin hi Krushchev a Soviet Union laia sei lian a ni. A la naupan viau laiin rukruk vanga mai a ni tawh bawk a. Russian media outlet Meduza tena court paper an tihchhuahah Prigozhin leh a thawhpui te chuan March 1980 khan St. Petersburg-ah hmeichhe pakhat suamin a gold beh te laksakin thichhawngin kawtthlerah an kalsan a ti. Hetiang deuha suahsualna kalpui a nei nual a. Kum 1981 khan Brezhnev’s Soviet Union jail-ah khung a ni a. Kum 1990 khan Soviet Union kehchhiat dawnah chhuah zalen a ni thung.
Soviet Union kehchhiat hnuah Prigozhin chuan nun thar kalpuiin St. Petersburg ah hotdog te zuarin hun a hmang a. Hun rei lo te hnuah a sumdawnna tilianin supermarket leh restaurant te a hawng zel a. Kum 1990 laihawl kha chuan Old Customs House (Staraya Tamozhnya) ah hawng tawh derin, St. Peterburg a dining nana hmun tha leh lar ber a ni zui a ni.
Mi ropui leh thiltithei tak tak ten a dawr chu an tlawh a, chung zingah chuan celebrity, billionaire leh politician te an kat nuk a, chung zingah chuan Anatoly Sobchak, Mayor of St. Petersburg pawh a tel a, Sobchak thachhang dawltu chu KGB operative hlui, politics bultan mek a awm bawk a, chu pa chu Vladimir Putin a ni.
Putin’s chef
Putin leh Prigozhin inlaichinna chu chunga restaurant-a an inkawmna atanga intan chu nia ngaih a ni a. Kum 1990 tawp lamah chuan Putin chu President Boris Yetlsin a Prime Minister ni der tawhin a hnuah a thlaktu a ni zui bawk. Putin-an Kremlin a thutchilh hnuah Prigozhin chuan sorkar catering contract turu ber ber achang zui a. A sumdawnna a lian tual tual a, a thiltihtheihna a sang tual tual bawk a. President Putin zarah global leader te a hmu chamchi bawk a.
Kum 2003-a Putin-an UK a tlawh tum pawh khan a zuitu zingah telin Putin leh Prince Charles (King of UK) te nen thla an la ho va, kum 2006-a Putin-an G8 summit-a US President George W. Bush a mikhual pawh khan Prigozhin hian eitur a serve a ni. Kum 2015 a thlalak Kremlin-in a tihchhuahah Prigozhin chuan Putin leh khatih laia Brazil President Dilma Rouseff leh Indian Prime Minister Narendra Modi te eitur petu a ni bawk a. Putin nena an inlaichinna leh a catering business lian zel avang chuan Prigozhin chu ‘Putin’s chef’ tiin an koh phah a ni.
Kremlin contractor atanga Russia security complex-a player pawimawh a nihna chu kum 2014 a Russia-in Crimea a chhuahsak leh eastern Ukraine-a Donetsk leh Luhansk seperatist te a thlawp leh puih atanga intan nia ngaih a ni. He mi kum vek hian Wagner Group chu din niin a dintu tak chu Dmitry Utkin, Russia military intelligence service GRU a Lieutenant Colonel hlui a ni a, prigozhin chu he group mamawh sum tumtu ber a ni thung. Kum 2014 khan Russia Defence Ministry be pawkin ‘volunteers’ te trainign pek a dil a, Ministry officials te chuan a demand an ngaihtheih loh thu an hrilh hnuah Prigozhin hian “Papa atanga thupek a ni” a ti tia sawi a ni a, Papa a tih hi Putin sawina a ni.
A duh tihhlawhtlin a ni a, Wagner te chuan private soldier sang tel training an pe a, chung mi te chu Crimea leh eastern Ukraine ah te tirh luh an ni. A tirah chuan Kremlin chuan Ukraine-ah sipai a tir lo a ti a, technically chuan Wagner te chu Russian defence forces mi leh sa an ni tlat lo a ni. Mahse, Ukraine a Donbas region-ah chuan ‘little green men’ tia sawi niin rei lo te chhungin Wagner te chu thiltithei em em a ni zui nghal a.
Russia-in foreign policy huangtau zawk a neih a, West Asia leh Africa a nasa zawka inbenbel a tumnaah Wagner te chu an tangkai em em a, heng hmunah te hian Wagner Group te hi a tir lut thin a ni.
Kum 2015 khan Putin chuan Syria ah President Bashar al-Assad pui turin sipai a tirlut a, Wagner te chuan Syria sipai te nen tangrualin an hmelma Hezbollah leh Shia paramilitary te chu an bei a. Hei mai bakah hian Wagner Group te chu Mali, Libya, Mozambique leh Central African Republic-ah te pawh tirhluh an ni a. Wagner te chu Kremlin foreign security kalpuinaa laksawn theih loh an nih tak hnuah Moscow a elite power circle-ah chuan Prigozhin insawhnghehna chu thuk tak a ni tawh.
Hmelma hlauhawm
Putin sawiseltute chuan Prigozhin chu hmelma hlauhawm an ti a. Navalny thuihruai Leonid Volkov chuan Prigozhin chu Putin a hualveltu zinga criminal hlauhawm tihialin a sawi a. Augsut 2020-a Belling Cat investigation chuan Prigozhin sumdawnna – sorkar contract, Wagner leh troll farm te chu Kremlin nena thuk taka inzawm tiin an sawi bawk a.
US Special Counsel, kum 2016 US presidential election-a Russia inrawlhna chhuitu Robert Muller chuan Russia-a inbun Internet Research Agency, Prigozhin nena inzawmna nei chu Hillary Clinton tihchhiat tuma beitu tiin a sawi a. Hei mai bakah hian FBI tena United States bum tuma chetla tia an mi duh a ni bawk a. Kum 2021 khan FBI chuan Progozhin awmna hrilh theih hnenah $250,000 pek an intiam hial a ni.
Ukraine indona chuan Prigozhinchu Russia a mi pawimawh ber pakhatah a hlangkai a. Independent Russian journalist Mikhail Zygar chuan Prigozhin chuan Moscow a power centre a kalkan deuh vek tawh a ti a. Indonaa Russian sipaite an chet chhiat viau chuan Prigozhin leh a thawhpui Chechen leader Ramzan Kadyrov te chuan langsar takin Russian sipaite chu an sawisel mai a. Putin chuan Ukraine a ‘special military operation’ akalpuinaah commander tum hnih a thlak tawh a, mahse, Prigozhin chu khawih chetin a la awm ve lo.
Prigozhin mi leh sate chu frontline a huaisen tak tak beitu ber te niin amah lah chuan commander ang maiin Telegram channel atangin thil thleng a tarlang zung zung bawk a. St. Petersburg a hotdog zuar atangin thiltithei turu a ni tawh a. Putin chuan Wagner a mamawh chhung chuan Prigozhin chuan tumahin an khawih thei lo tih a hai lo an ti bawk.