Russian president man remti dawn lo

Russian president Vladimir Putin an South Africa a tlawh huna man tumna a awm a nih chuan Russia laka indo puanna a ni ang, tiin South Africa president chuan a sawi.
Cyril Ramaphosa chuan Johannesburg-ah international meeting a awm tur thu sawiin chutah chuan Russian president chu sawm a ni, a ti a.
Mahse, Putin hian Russian leilung a chhuahsan a nih chuan International Criminaal Court (ICC) chuan man thei reng a ni thung a. South Africa chu ICC signatory a ni bawk a, man tumna awm se, pui tur a ni bawk.
Mahse, ICC thu hi a zawm ngai chuang lo, kum 2015 pawh khan khatih laia Sudan president Omar al-Bashir war crime kaihhnawihna manna thupek chhuah tawh chu a man duh tawh chuang lo bawk.
Putin hi South Africa-ah August thlaa zin tura sawm niin BRICS meeting a awm dawn a, BRICS tih hi Brazil, Russia, India, China leh South Africa tihna niin economy thang chak ber ber te intelkhawmna niin G7 group te el pha bera ngaih an ni.
Hetih lai hian South Africa-a opposition lian ber Democratic Alliance te chuan Putin chuan an ram leilung a rap a nih chuan man nghal tur an ti ve thung.
Mahse Ramaphosa chuan Putin man tum chu national security atana pawi thei a ti ve thung a. “Russia-in chiang takin, an president-in man a tawk a nih chuan indo puanna a ni ang, an ti a, Russia nena inbakkaih hi kan constitution nena inmil a ni lovang,” tiin a sawi.
Ramaphosa chuan South Africa chu indo a tawp theih nana Russia leh Ukraine te pawh biangbiakna nei ve ve a nih thu a sawi zui bawk a. Thla kalta pawh han Peace Mission tiin inremna a awm theih nan chet an la a ni.
Africa ramte chuan UN general assembly resolution-a Ukraine indonaa Russia demnaah pawh an inhnamhnawih duh tawh lo va. A chhan hrang hrang vang niin South Africa-a anti-apartheid leh Soviet Union inlaichinna te tuna Mali rama jihadist te beihnaa Russian Wagner mercenary te inrawlhna vang te pawh a ni tel vek tia sawi a ni.