Rybakina a chak, Sabalenka a tla

Nilaini khan Dubai Tennis Championship khelh chhunzawm a ni a, hmeichhe lamah mak tak maia Elena Rybakina a chak laiin champion tura rinkai Aryna Sabalenka chu Clara Tauson hneh lovin a tla ringawt thung.
World number seven Elena Rybakina hian last 16-ah Paula Badosa a hmachhawn a, quarter-final lut zo lovin a tla teuh hle. Badosa lakah hian beisei angin bul a tan tha lova, set khatnaah game li chauh a la. Set khatna a hloh hnuin set hnihna a hloh zui leh teuh viau a, tie-break-ah chungnung hramin tlak a pumpelh. Set khat ve ve an lak hnuin an inhnehtawk zui viau a, set thumnaah tie-break hmangin chak zawk zawn chhunzawm leh a ni. Tie-break-ah Rybakina a chungnung zui leh a, Paula Badosa lakah hian 4-6 7-6 (10-8) 7-6 (7-2) a chakin quarter-final a lut.
Rybakina hi Badosa hneh lovin a tla teuh hle a, match point vawi ruk lai a save hial a. Tla mai tura ngaih a nih tawh laiin mak leh ropui takin a chak a, quarter-final a lut ta zawk a ni. 2022 Wimbledon champion Rybakina hian quarter-final -ah champion lai Jasmine Paolini hnehtu Sophia Kenin a hmachhawn zui leh ang.
Mak leh ropui taka Rybakina a chak lai hian inkhel dangah champion tura rinkai Aryna Sabalenka chu World No. 33 Clara Tauson lakah set la lo; 6-3 6-2 in a tlawm ringawt thung. Kum 2024 a chetha tak Sabalenka hian kum 2025-ah a khel tha lo hle. Kum 2025 chhung hian inelna lianah champion na a la nei lova, tun thla tir lam khan Qatar Open ah Ekaterina Alexandrova hneh lovin a tla hma viau bawk.
Sabalenka hnehtu Tauson hian mak tak maia Jessica Pegula hnehtu Linda Noskova chu quarter-final-ah a hmachhawn zui leh ang.