Rybakina leh Jabeur-te’n last 8 lut ve leh

Rybakina leh Jabeur-te’n last 8 lut ve leh
All England Club-a Wimbledon hmei-chhe singles khelh mekah Arab leh African tennis player zinga hlawhtling ber ni mek Ons Jabeur chuan Petra Kvitova hnehin nikum final-a a ngam loh Elena Rybakina nen semi-final luh an inchuh dawn.
Tunisian hian he hmuna vawihnih champion ve tawh Kvitova lakah inkhel thununin 6-0 6-3 hnehna a chang.
Sixth seed Jabeur hian tunhma lama vawinga a lo tawn tawhah Kvitova hi vawili a hneh lo tawh a, chu’ng zingah chuan kum 2019 Wimbledon first round kha a tel.
Chu chu an lo intawn tawh dan boruak ni mah se grass-a vawiriat chak zawn mek Czech Kvitova chu Centre Court-ah a che thei lam lo a, unforced error pawh tum 26 ngawt neiin, kum 28 mi Jabeur zawkin tuntum chu minute 63 lek chhungin hnehna buhchangrum a chang a, quarter-final pakhatah champion lai leh nikuma a ngam loh ni bawk Rybakina laka phuba lakna hun remchang a nei thei dawn!
Hnehna a chan hnuah Jabeur chuan on-court interview-ah kum khat liamtaa 3-6 6-2 6-2-a a hneh loh laka phuba a ngaihven tur thu a sawichhuak chher chher!
Arab nula chuan, “Nikum final kha chu ka tan a harsa a ni. Kumina kan intum leh turah erawh vawiin anga tha hian ka khelh theih ka beisei a, match harsa tak ni leh tho dawn mah se ka chak tawh ka ring,” a ti.
Round of 16 inkhel dangah Kazakh champion Rybakina pawhin Jabeur aia awlsamin hnehna a chang a, game nga chiah an khel hman tihah hliam avanga 13th seed Beatriz Haddad Maia a inhnuhdawh avangin hah loin last eight a lut.
Centre Court-a zing lam inkhel hmasaber game lina an zawh rualin Brazilian Haddad Maia a nuamlo tan a, a hnung kawng bawr chunglam na avangin medical timeout la bawk mah se mittui nen 4-1 ni chungin court a chhuahsan ta a ni.
Rybakina hian he match-a a first serve-ah ace nen bul a tan nghal pap a, game lina a break zui leh a, tah chiah hian French Open semi-finalist Haddad Maia a talbuai tan a, a hnung lam kawng dawm chungin umpire chu physio koh a dil a, rilru hnim tak tih hriat chungin kal a harsat tih a hmuh theih a, medical timeout zawhah khelh chhunzawm turin court chhungah kirleh bawk mah se ngai a awh thei ta lo a, Rybakina ‘ace’ kan hmuh leh hnuah Maia chuan a kal thei lo tih umpire hrilhin, a tumpui Kazakh pawhin hliam tuar hnem turin a va pan vat a; inkhelh banah third seed Rybakina chuan khati anga game tawpsan kha a tuartu tan a harsa hle thin tih sawi chungin a tumpui hliam chu a serious loh hram a beisei thu a sawi a, round dang a khel leh theih dawn avanga a hlim thu a tarlang tel.
Tun kha Wimbledon-a Brazilian kum 27 mi Maia thlen thui ber tum niin, fourth round a chuangkai pha a, Roland Garros lamah erawh semi-final a lo thleng ve tawh.
Inkhel dangah second seed Aryna Sabalenka pawhin 6-4 6-0-a Ekaterina Alexandrova hnehin last eight a lut ve bawk.
Australian Open champion Sabalenka hian a second-round match-a France mi Varvara Gracheva a tum tum khan set a hloh a, a hnu lamah erawh chetsual lian tham a nei zui duh tawh rih lo!
Last 16-a a tumpui Russian 21st seed Alexandrova kha grand slam fourth round a khelh vawikhatna niin, kum 25-a upa Belarusian hlap na lutuk leh baseline atanga a nawr na lutuk kha a tuar ngang lo a ni.
2021 Wimbledon semi-final lutin, nikumah Belarus player a nih avangin All England Club-ah a inlan thei lo a, kuminah erawh danbeh a tawk ta lo a, SW19 lamah pawh a chetthat chhunzawmin, kumin bikah hian grand slam match 16 a chak tling tawh.
Quarter-final match pakhatah Saba-lenka hian warm-up tournament lian Eastbourne champion Madison Keys a tum leh dawn a; last eight lut turin American hian Russian tleirawl kum 16 leka upa Mirra Andreeva chu Thawhtanni inkhel dangah a hneh a, ti hian, kum 2009 hnu lama a vawikhatna atan kumin hian top four women’s seed luahtute’n Wimbledon quarter-final an lut kim ta vek a ni.
Nizan quarter-final result tarlan hman lohah Swiatek leh Svitolina intumin, Pegula leh Vondrousova-te an inhmachhawn bawk.