Sabalenka kut a\angin US Open trophy lum bo zo lo!
Sabalenka kut atangin US Open trophy lum bo zo lo!
Belarusian world No. 1 Aryna Sabalenka chuan Inrinni zan final-ah 6-3, 7-6(3)-a tualchhung nula tantu ngah Amanda Anisimova hnehin kum 2012-14 champion Serena Williams hnu lama Flushing Meadows women’s singles title humhim leh thei hmasaber a ni.
New York khuaa tennis khelmual hmingthang Arthur Ashe stadium-ah kum 27 mi Sabalenka hian set khatnaah harsatna lian tawk lo mah se set hnihnaah tualchhung nula Anisimova hian chuti maia trophy thlah a duh bik lo a, rei ngial chu a han chelh ve bawk a, defending champion tankhawh em chu a chelh zo ta chuang lo a ni!
Home hope beiseina chhattu Belarusian khan kum 2023 leh 2024-ah kum zawnin Australian Open title a lo hlawhchhuak tawh bawk a, Flushing Meadows-ah title humhim chungin US Open trophy pahnih a kawl tling ta.
Inkhelh banah hnukulh teuh chungin Sabalenka hian a team-te chungah lawmthu a sawi a, 2025 season-a tlakhniam leh chetthat a fawm chhoh chungchang tarlang telin, “Kumin hi kum khirhkhan tak a ni a, hun harsa tak takte khan zirlai min pe a, he title ka hlawhchhuah leh ka zirlai harsa tak tak kha a inhen tawk chiah a ni,” ti chungin champion zo ta lo mah se Grand Slam final vawi hnih a khelh zawn theih avangin American Amanda a lawmpui tih a tarlang tel.
Inrinni final-a intumte kha hmeichhe tennis khawvela vaw na ve ve niin, eighth seeded Anisimova khan a inrintawkna a hloh titih tlat a, semi-final lama four-time major winner Naomi Osaka a hneh tuma a cool raih ang khan final-puiah meuh chuan a damdap zo ta lo a; Iga Swiatek laka phuba tuihnai zet a lak ang boruak pawh kha a pha ta tlat lo a ni!
Kum 24-a upa American hian unforced error a nei pheng phung a, a mamawh ngawih ngawih laiin a ralthuam hlauhawm ni thin a forehand pui tak thin khan a phatsan thin bawk si a, chu tak chu world No.1 khan hun remchangah lain a lo chhulet nghauh nghauh a, American mipuiin an ram atanga Grand Slam title chhuahtir tawh loh hram an beiseina Anisimova hian a tihhlawhtlinsak zo lo.
Kumin July thla mai Wimbledon final-ah pawh khan a champion kawng hawi lo zawng bawkin Anisimova hi hun pawimawhah a lo nep dui tawh a, Swiatek lakah score record chhe thei ber (6-0, 6-0)-in a tlawm a; an kawtkai major tournament-ah Pole hi hnehlet bawk mah se title match berah a khel tha leh ta lo tlat a ni.