Sabalenka tana fiahna tling Potapova

Sabalenka tana fiahna tling Potapova
World number one Aryna Sabalenka chuan Australian Open kal laia a hmasaber ni turin nimin khan fiahna tling match a khel ve ta a, Austria nula Anastasia Potapova nen rei iak an inbei a; rim taka thawk chungin 7-6(4), 7-6(7) hnehna hautak zet nen fourth round a lut hram!
Russia-in Ukraine a run hnuah ram leh ram inkar politik hian Grand Slam-ah nghawng a nei chho reng a; Russia leh a sangawizawnpui Belarus chu major tournament-ah hian an ram hming tarlan phalsak an ni lo a, four-times Grand Slam champion Sabalenka pawh hi a hming zawnah an ram hnam puanzar dah a ni lo.
Potapova pawh hi tunhnaiah Russian atanga Autrian-a inlet niin, a nationality a thlak avangin Europe laili ram Austria hming behchhanin Melbourne Park-ah hian a inlan thei ta a ni.
Rod Laver Arena inkhelah Potapova hian top player lakah pawh a khawng ve tawk a ni tih a pholang a; inkhelh bana an kawmnaah Sabalenka pawhin magic hmanga tlang hram a nih thu sawiin a tumpui a fak chiam.
Kum 2023 leh 2024-a a zawna a champion-na mual Melbourne Park-ah a zawn zata a tum rukna atan Sabalenka chuan fourth round a lut a, Canadian 17th seed Victoria Mboko lakah fiahna dang a hmachhawn leh ang.
Australian Open main draw-a a inlan vawi khatnaah ihang tleirawl Mboko hian third round inkhel dangah 7-6(5), 5-7, 6-3-in Danish 14th seed Clara Tauson a hneh a, last 16-ah top seed Belarusian a hmachhawn dawn ta hial a ni.
Tleirawl kum 19 mi Victoria Mboko hi kum 2015 daih tawha Eugenie Bouchard hnu lama Canadian zinga Australian Open last 16 lut leh thei hmasaber a ni.
Australian Open big upset
hmasa hei le!
American tleirawl Iva Jovic chuan nimin khan a career-a a vawi khatna atan top-10 player a hneh a, Australian Open third round match pakhatah Italian world number eight Jasmine Paolini chu 6-2, 7-6(3)-in a hneh!
Ti hian, kumina tour kal laiah Jovic hi match 10 a chak zawn tling ta chiah a ni.
Italian seventh seed Paolini lakah 29th seed Jovic hi nikum khan Indian Wells leh US Open-ah a lo tlawm tawh a, Melbourne Park-ah pawh chak zawk tura beisei a ni loh laiin a tennis zinkawnga hnehna lian ber a nghakchhuak ta a ni.
Jovic hi a n leh pain Serbia atangin United States-ah an pempui a, American ni tawh mah se Paolini a hmachhawn hma khan thisena a zawmpui Novak Djokovic hnen atangin thurawn a la a, chu mi chungchang chu sawiin:
“Nimin khan Novak ka be zawk a, ka game khelh tur atan thurawn tha zet min pe a, he match atan hian hmantangkai ngei ka tum a, Novak-te angin thurawn an pe che a nih chuan zawm loh chi a lo,” tiin a sawi.