SAFF C’ship khel tan

SAFF C’ship khel tan
Nimina khelh tan tak SAFF Championship 2023-ah tlai dar 3:30 khan opening match-ah Kuwait chuan 3-1-in Nepal an hneh a; zan dar 7:30-ah Mizo player pahnih telna India leh thenawm hmelma lian Pakistan intum ve lehin, he thu buatsaih lai thleng hian India chuan sihnih faiin hma an hruai mek a, result kimchang erawh tarlan hman a ni lo.
SAFF Championship hi Asia khawmualpui chhim lam ram bik huap international men’s football championship niin, kum hnih dana khelh mi a ni a, South Asian Foot-ball Federation huaihawt niin, kumin hi tournament vawi 14 an khelhna a ni.
Indian football team hi Intercontinental Cup-a champion hlimhlawt an ni a, inrintawkna sang tak nen Sree Kanteerava Sta-dium, Bengaluru, Karna-taka-ah bul an tan a; Pakistan lam hi Thawh-tannia India visa nei fel chauh an ni nghe nghe.
He tournament-a vawiriat ngawt champion tawh Blue Tigers hi a thlengtu nih manah pawh champion tura rinkai an ni leh mek a; kumin hian Group A-ah Nepal, Kuwait leh Pakistan nen awmhoin, Group B-ah Lebanon, Maldives, Bhutan leh Bangladesh an awm thung.
Karliamta Pathianni mai khan Kalinga Sta-dium-a Intercontinental Cup fuinal-ah a thlengtu India chuan sihnih faia Lebanon hnehin cham-pion trophy an chang a; kha final match-ah khan Lunglei tlangval Lallian-zuala Chhangte chuan captain Sunil Chhetri goal tur a siamsak hnuah goal khat a thun zui ve bawk.
Kha hnehna kha kum 46 chhunga Lebanon laka India chak vawikhatna niin, team khawng an hnehna kawnga thawh-hlawk India No. 1 striker Chhetri khan ram tan match 137-ah goal 87 a tilut tling chiah a, Asian footballer zinga interna-tional goal khung hnem ber Mokhtar Dahari of Malaysia (89) dawta thun hnem ber a ni.
SAFF tourney kal mekah hian goal thum a thun tlin chuan Dahari Asia record pelin Asian zinga ram tana goal thun hnem ber a ni tawh ang.
Mimala an captain-in record a siam theih rual hian India chuan SAFF Championship-ah hian record a nei tha hle a, tunah pawh hian defen-ding champion niin, kum 2021 tournament-a an champion hma khan kum 1993, 1997, 1999, 2005, 2009, 2011 leh 2015-ah SAFF title hi an lo hlawh-chhuak tawh bawk a ni.
Bengaluru-ah hian an title kawl lai humhima tournament record an siam sawhnghet thei tura ngaih an ni a; India tih loha champion ve tawh dang awmchhun pahnihte chu Maldives (2008, 2018) leh Bangladesh (2003) an ni.
Kumin tournament-ah hian title an hum leh theih chuan Igor Stimac-a team hian FIFA ranking tharah hma an sawn ang.