Tuipuiral chak ni herchhuak ve ta hram!

Tuipuiral chak ni herchhuak ve ta hram!
Anurag Rawat chuan set hnih hloh zawn tawh Tuipuiral hruai kirin Thawhlehni zanah 3-2-in Durtlang North an hneh a, a vawikhatna’n Tata SK 712 Pro Volleyball League-ah an chak.
R. Dengthuama Indoor Stadium, Mualpuiah 2-0, 10-5-a hniam zawk an nih hnuah chak duhna nei nasa zawk Tuipuiralin 14-25, 20-25, 25-23, 25-23, 17-15-in Durtlang North an pawtthla a, a mawng atangin semi-final lut thei palinaah an insawn chho.
Inrinni zan khan kai thar Tuipuiralin chiang taka set khatna an hloh hnuah tum hnih an la zawn a, chak zo lo chungin champion tura rin hlawh zinga mi Hunthar an chhaihbuai a, Anurag chuan point 54 a hlawhchhuak.
Durtlang North hmaah set hmasa pahnih hloh zawn nghal mah se chak thei thinlung puin an beilet a, Delhi atanga an lakluh Anurag chuan tum 62 vaw tlain point 24 hloh mah se filawr taka D3 Business Player of the Match a nih rualin Tuipuiral point hmuh zawng zawng atanga 61% a thawkchhuak.
Durtlang North-in theihna nei mah se chak tur khawpa feiin an khel thei lo tluan a; Karnataka captain Anup D Costa chuan point 22 a hmuh chanve a paih a, team chakpui miah loin Mizo leilungah tawnhriat chhe tak a hnutchhiah.
Vanlaltanpuia leh Johan Vanneih-sanga’n point 14 ve ve thawkchhuakin mi mala an chetthat tum a ni na a, champion lai ni chunga khelh nga tlawm zawn hmasa ber ni chungin Durtlang North-in cham-pionship an thlahliam a, point khat hmuin a mawngah an awm.
Vawi khat tal chak tumin inkhel an thunun hmasa a, awlsam taka set an lak hnuah 19-9-in hma an hruai. Tuipuiral talbuaiin an innghahna Anurag an lachhuak a, lehlamin an player chhawr rim tenkhat an thlak bawk.
Set thum la zawna chak tlang mai thei turin Anup chuan vawi hnih a hlap tla zawn a, set thumna laihawl an thlen hma deuhin point ngain Tuipuiral an kalsan.
Mahse, khelmuala a kir leh hnuah koham zawkin Anurag a inlar a, boruak tidanglamin 13-13 a nih hnuah 19-16-in an lehpel. Durtlang North tanhmun a phet laklawh a, hnaih zui viau thin mah se an pawt ding zo tawh lo.
Set linaah KC Laldawngzela’n net chungah Durtlang North captain Fabian Lallunghnema vuak a dang tla a, Anurag chuan Anupa vuak dal zui ve lehin 17-8-in Tuipuiral an sang a, an fal lai ber a ni.
Durtlang North-in player inkhairual zawk an nihna lantirin Johana’n a service atangin point a hmu a, 20-20 a nih hnuah 23-23 thlengin an intluk chho zel.
Hun pawimawhah Anurag chuan a hlap tla a, an inkhelh chhung zawnga a point hmuh leh hloh 14 ve ve Fabian-a vuak a dansak zui bawk a, Tuipuiralin set an la zawn.
Rilru leh taksa lama fiahna tak tak hmachhawn dunin set ngana tirah 4-0-in Durtlang North an sang nghal a, mahse, a hma ang thoin a tawp thleng tura ke pen an harsat leh a, Anurag chuan Johan-a ball ben dang thlain Tuipuiralin 14-13-in an lehpel.
Point khat hmua chak thei dinhmuna an awm hmasak berah khawchhak team an hriam zo bik lo na a, 15-15 a nih hnuah Delhi tlangvalin point hlu tak a hlawh zawn a, a inkarah Fabian-a’n vuak tlak theihna hun ha a tihlawhtling zo lo a ni.
PC Vannunmawia’n point thum hloha tum nga a vuak tlak zinga a chanve aia tam set nganaah thawkchhuakin, vawi thum a vaw tla. Tuipuiral Mizo player-te’n inrintawkna sang zawk nen an khel tih a lang a, Lalrammawia Fanai chuan point ruk hmuin vawi hnih a tisual.
Vawi li an khelh tawhah Tuipuiralin point thum an hmu a, chiang taka Chhinga Veng Spikers leh TNT laka an tlawm zawn hnuah rahbi an tuk sang zel. Ningani zanah league an khel zo dawn a, anni aia point khata hniam Tuichangral nen palina an inchuh dawn a ni.
Bawisei nei tawh lo ve ve inkhelah
Power chungnung
Tata SK 712 Pro Volleyball League an khelh hnuhnun berah Power Department Sporting Club an chak a, nimin tlaiah tlaiah set thum faiin Durtlang North an hneh.
R. Dengthuama Indoor Stadium, Mualpuiah team pahnih tan semi-final luhna kawng a inhawng tawh lo a, Power player-te’n thawhhona tha tak lantirin 25-8, 25-18, 25-22 hnehna an chang.
Lalrammawii’n point kua hmuin tum li a hloh a, a vawikhatna’n D3 Business Player of the Match-a thlan a ni a; ani bakah Lalfakzuali leh Angeli Lalhriatchhungi’n point hnih hlohin vawi nga ve ve an vaw tla a, Vardingliani’n point li thawk chhuakin vawi khat a tisual.
Kum 2017-a Pro Volleyball hmeichhe champion hmasa ber lo ni tawh Power-in engemawchen team an tinung zui lo a, hranghlui leh inkhelh chawlhsan tawh kokirin Mizorama inelna sang berah an tel thar leh a, an beisei ang ni lo mah se a tawpah nuam ti takin khelmual an chhuahsan.
Harsa loa set hnih an lak zawn hnuah Angeli chuan vaw tlain 24-17-in an sang a; player naupang rual awmkhawmna Durtlang North-in point nga hmu zawnin dal tum viau mah se an dang tluan zo lo.
Kum thar thlirin Durtlang North-in kum lama la naupang tleirawl tak tak tan inelna sangah hun tha an siamsak a; chutih laiin nikum ang bawkin harsatna an tawk leh a, kum 2019 Pro Volleyball champion an nih hnua vawi riat an khelhah an tlawm vek a ni!
Melody Lalrintluangi’n point nga hlawhchhuakin tum hnih a hloh a, an innghahna ber Lalpekhlui’n vawi 10 vaw tla chungin point 12 a paih.
Vawi nga an khelhah point khat mah hmu loin Durtlang North an tla a, an chung chhiaha awm Power-in point li hlawhchhuakin tum khat an chak ve thung.
Vawiin, Ningani tlai hian a sang pahnih Kanan leh Luangmualin pakhatna nih an inchuh dawn a, hmeichhe league khelh zawh a ni ang.