SAI inelna lianah Medal pa 7

India leh South Korea in thianthat kum 50na denchhena buatsaih All India Inter SAI Taekwondo Championship, New Delhi, February 24 – 26, 2023 chhunga neih ah Mizo ten Gold 2, Silver 2 leh Bronze 3 an la.
Gold Medal pahnih hi Ramdingliani lak ve ve niin Kyorugi inelnaah leh Poomsae inelnaa a la lak a ni a. Kyorugi-ah Under 45kg a khelin a Khelh khatna hi a bye a, a khelh hnihnaah NCOE Trivandrum naupang nen an in tumin round hnihnaah a Knock Out a. Semi Finalah STC Kargil player pawh round hnihnaah bawk a knock Out leh a ni. Finalah hian India rama Taekwondo zirna hmun tha bera chhal ngam, NOEC Lucknow Naupang nen an intum a, Rami hian inhneh tawk tak chungin 5-6, 6-13 a round lain a champion pui ta a ni. Tin, Rami hian Poomse inelna Junior category ah a khel leh a, Gold a la leh bawk a ni.
Chanmari West nula Ramdingliani hi Mizoram Amateur Taekwondo Association-in Olympic Vision Player a neih zinga pakhat niin nikum kum tawp khan zirna tha zawk nei turin Bangalore SAI Centre-ah nikum khan dah a ni a. A kalna senso hi Sport Minister Pu Robert Romawia Royte in a tumsak nghe nghe. Gold medal a lak avangin hian Korean Sawrkar tum sakin Korea ramah training turin a kal zui ang.
Poomsae Inelnaah hian Venhlui tlangval Lalthlamuanpuian Senior Under 30 category-ah Silver a la bawk a. Quarter final atangin Knock out system an hmang a. Puia hian Quarter finalah Punjab tumin a hneh a, Semi finalah Delhi tum lehin a hneh leh a, Finalah hian Services(SSCB) nen in tumin Puian 7.30 a score laiin SSCB hian 7.36 a score avangin Silver a la ta a ni.
Category dangah Stella Lalmuanpuii, Armed Veng South tuna Aizawl SAI a awm mek chuan Silver medal a la a. Marcus Vanlalruatpuia Ramthar veng, Lunglei chuan under 49kg Semi finalah NEOC Bangalore lakah 3-2, 5-2 a chak lovin Bronze medal a la a, Hmingchhuanmawia Lawngtlai pawhin under 49kg Semi Final vekah ABSC Nasik lakah 6-2, 3-1 a chak lovin Bronze medal a la bawk. Stephen Lalhminghlua Khaw-zawl chu semi Final ah vanduaiin Bronze medal a dawng ve bawk.