Sairang – Vairengte kawng leh Tlabung kawng siam mek

Sairang – Vairengte kawng leh Tlabung kawng siam mek
Sairang leh Vairengte inkar kawngpui leh Lunglei leh Tlabung inkar kawngpui chu October 14 ralhmaa thawmthat zawh an tum tih NHIDCL executive director Virendra Jhakhar chuan a sawi.
NHIDCL executive director hi Thawhtanni khan Central YMA hruaituten an hmu a. Mizoram hmun hrang hrang inkalpawhna kawngpui lian, NHIDCL enkawlna hnuaia siam mek chungchang an sawipui. Kawng tha zawk neih theih nana kawngpui siam thar leh a awmsa tih zauh mek chu furpui avanga harsatna an tawh an hriatthiam pui rualin, ram mipuiin kan tuar ta lutuk leh manganthlak khawpa kawng chhia a awm ta chu hriatthiam harsa an tih thu an thlen.
NHIDCL hotu hian Central YMA hruaitute thu thlen chu chhangin, hetiang hian hunbi tiam siamin an hmalak dan tur a lo hrilh – Sairang leh Vairengte inkar kawng chhe zualpui hi, ruah a sur loh chuan October 14 ralhmain pangngai taka lirthei tlan theiha siam an tum a. Lunglei leh Tlabung inkar kawng pawh, ruah a sur loh zel chuan October 13 ralhmain pangngai taka lirthei tlan theiha siam an tum. Saitual to Tuivai (Manipur road) an thawmtha mek a, ruah a sur loh zel chuan hun reilote chhungin lirthei chitin tlan theiha peih an tum.
October 24-26 chhunga Biatea YMA Inkhawmpui neih turah Mizoram hmun hrang hrang atanga Biate panna kawng, NHIDCL hnuaia awmte chu October 20 ralhma in lirthei chitin tlan theihin an lo siam vek anga, a tul dan azirin Sub-Hqrs/ Group/ Branch YMA hruaituten an huamchhung kawngpui chu October 20-ah an endik anga, tha tawk lo leh lirthei chitin tana tlan harsa lai deuh chu October 24 hmain an siamtha leh ang tiin, executive director hian thu a lo tiam a ni.
NHIDCL hotu hian Central YMA hruaitute hnenah an harsatna tawh hrang hrang a lo hrilh a. Ruah sur reng mai chuan an hnathawh a tikhaihlak nasa a, harsatna a siam nasa zual tih a sawi. Khuain zah a ngaih zel chuan, an hnathawh pawhin hma a sawn chak theih tawh tur thu a sawi a ni.
Central YMA hruaitute hian NHIDCL chu an contractor-te tun aia chaka hna thawk tura nawr turin an hrilh a. Amah ngeiin hnathawhna hmun a tam thei ang ber tlawh thin tur leh harsatna awmte ama hoa chingfel thuai thin turin Virendra Jhakhar hi an hrilh. A tul chuan, hmun hrang hranga YMA Sub-Hqrs, Group leh Branch hruaitute pawh an harsatna sutkuanpui tura sawm thin turin an chah bawk.