Sairangah hnamdang chhuah khap

Sairang khaw mi zinga thil tisualtute chunga hnamdangin hma an lo lak danah Sairang khawtlang hruaitute chu lungawiloin darkar 48 chhung an huamchhungah hnamdang pawn chhuah an khap.
Sairang Village Council & All NGO thuchhuak chuan, September 7 khan Sairang tlangval thenkhatten Railway hnathawkte tana harsatna an siamsak thin chu pawi an tih thu sawiin, rukruk leh pawikhawihna thlentute chungah dan ang taka action lak a nih zel chu an duhdan a ni a, thil tisualtu lamah hian khawtlang chu tan a tum ngai dawn lo tih an sawi.
Chutihrualin pawikhawihtute chungah dan ang taka action lak theih a nih lai a, hnamdang (Vai) hnathawkten mihring mihrinna zah lo leh hmuhsitna lam hawi zawnga Sairang tlangvalte an khawtualah kut an thlak chu pawi an tiin, he pawikhawihna hian Sairang a tih mualpho, he thil thlennaa pawikhawihtute hrem an nih theihna turin Joint Committee chuan thuneitute a phut tih a sawi a ni.
‘Tun hnuah hetiang hi vawikhatmah a thlen tawh lohna tur, hnamdang Sairang leh a vela awmten kan thalaite kutpalh an tawrh lohna tur leh an him zawk nan September 10 zing dar 12.01 atanga September 11 zan dar 12.00 chhung chu hnamdang, an khawchhunga awmte leh hnathawkte pawn chhuah khap a ni tih a sawi a, hnamdang dawrkaite pawh dawr khar vek turin a hriattir bawk.
An thuthlukna chu hnamdangten Mizoram chu Zofate ta a ni tih an hriat a, an duh ang anga che leh khawsa thei an nih loh zia an hriatna tura tih a ni tih Joint Committee hian sawiin, tharum thawhna lam hawi zawnga che chhuak lo turin an inngen nghal a ni.