Saitual Court hmun tur endik

Gauhati High Court judge, Justice Kaushik Goswami chuan Ningani khan Saitual tlawhin Ruallunga District Court Complex ram tur a hmunah a enfiah.
High Court judge hian Court Complex hmun tur chu amah ngeiin Saitual, Serchhip and Mamit Judicial Districts portfolio judge a nih angin, architecture plan leh a tul dangte a pawmpui hmaa tlawh a duh avanga kal a ni tih a sawi a. A hmun chu khua atangin hla deuh mah se, hmun rem tak a ni, tiin, a kalpawhna pawh tha zawka siam a nih theih chuan mipui tan a zangkhai zawk hle dawn tih a sawi a ni.
Saitual District Court Complex tur hi Ruallung khaw daiah a awm a; tlang pawng zawl tha tak a ni. Court hian land lease nei tawhin, architecture plan leh thil tul dangte pawm theiha peih tawh a ni. Pawmpuitu tur Justice Kaushik Goswami hian a hmunah a en a ni.
High Court judge hi Saitual bawrhsap Dr Lalngura Tlau leh SP Pukhraj Kamal ten lo dawngsawngin, Court Complex ram ennaah hian an kalpui a. Aizawl atangin Gauhati High Court Aizawl Bench registrar TL Guite leh District & Sessions judge Aizawl Judicial District Joel Joseph Denga ten an tawiawm a ni.
2023-ah POCSO Act-ah case 112
Kum 2023 chhung khan Mizoramah kumtling lo laka pawikhawihna avangin POCSO Act hnuaiah case 112 ziahluh a ni.
Ningania Lunglei District Child Welfare & Protection Committee thutkhawmah hei hi report a ni a. Mizoramah kum 2023 khan POCSO Act hnuaiah case 112, IPC hnuaia thubuai siam kumtling lo pawngsualah case 3 leh kuminah POCSO Act hnuaiah case 12 a awm tawh tih sawi a ni. Lungleiah naupang dahna home 6 awmin, hmeichhe naupang 49 leh mipa naupang 80, an vaiin naupang 129 an awm.
Thutkhawmah hian sawrkar leh private school-ah naupang himna tur ngaihtuah (child protection) lama mawhphurtu bik ‘nodal teacher’ ruat tura rel chu district education officer-in ruahmanna siam se, District Child Protection Unit-in training buatsaih sak se, tih a ni.
Dan loa ram chhung leh ram pawna naupang lakluh leh thawnchhuah chungchangah member-ten vil leh ven kawngah hma lak nise, Lunglei District Task Force on Child and Adolescent Labour (Prohibition and Regulation) Act 1986 din a nih tawh thu sawi a ni.
POCSO Act, naupang kum tling lo hnathawka chhawr leh inneih tir bakah sumdawnna atana hman, ruihhlo leh vaihlo hmansual bakah HIV laka venhimna atan school leh kohhranah zirtirna tam zawk pek nise; ASHA leh Anganwadi worker-te hman tangkai nise, tih a ni. Home hrang hranga naupang awmte hriselna endik saktu tur doctor, senior chief medical officer Civil Hospital leh Christian Hospital Serkawn te ruahmanna siamsak tura ngen nise, Observation Home leh Special Home tan ruahtui khawlna tur tuizem ngaihtuah sak leh Home naupangte tan kutthemthiamna lama hma laksak dan turte rel a ni.
Naupang ruihhlo leh hursualna hmang diklote tan Child Care Institution din dan tur leh hmalak dan tur rel a ni bawk.