Saitualah Girl Child Day khar
District Hub for Empowerment of Women (DHEW) Saitual leh District Child Protection Unit, Women & Child Development Saitual tangdun buatsaih International Girl Child Day 2024 chu Thawhtanni khan khar a ni a. Saitual district-a hmeichhe naupang hlawhtlinna changte lawmman sem nghal a ni.
Hmanpuitu district bawrhsap Dr Lalngura Tlau chuan Mizo hmeichhiaten hma an sawn em em rualin hmeichhe chunga hleilenna awm thin lakah hmeichhiate humhim a tul takzet tih a sawi. Chumi tur chuan Saitualah pawh Mission Shakti hnuaia hma lak niin, hmeichhe baihvaite tlukluhna tur One Stop Centre pawh din a ni tawh tih a sawi a ni. Naupangte dikna chanvo rahbeha a awm loh nan department hrang hrang tangruala thawhhona tha tak neih a tul tih a sawi bawk.
International Girl Child Day hi kumtin October 11-ah hman thin a ni a, kumin thupui atan ‘Girls’ vision for the future’ tih hman a ni. Hemi pual hian Saitualah hian October thla chhungin activity hrang hrang – Aganwadi Centre-a PMMVY chungchang awareness neih, Rashtriya Poshan Maah – Fruit Festival leh financial literacy buatsaih a ni. Saitual district-a hlawhtlinna chang hmeichhe naupang (girl achiever) lawmman dawngtute chu – Catherine Malsawmzuali, Lalhluzuali, Lalruatpuii, PC Lalremsiami, PC Lalrinpuii, Vanlalmuanpuii, Vanlalrinmawii Khiangte leh Zodinmawii te an ni.
Saitualah Girl Child Day khar
Get real time updates directly on you device, subscribe now.
Next Post