Sakhuana vanga vote nei lo tur mi 300 chuang

Electoral roll siamthat hna thawh mek a ni a, Mizoramah vote neih duh lo mi 300 chuang an awm – sakhuana vanga vote neih hi duh lo an ni.
India ram pumah Special Intensive Revision (SIR) neih a ni a, Mizoram chuan June ni 28-ah a zo. Mahse siamthatna hun te hawn a la nih dawn avangin zawh fel chu a la ni lo. Tuna hriat theih chinah vote nei duh lo an awm nual.
Directorate of election atanga thu dawn danin, vote nei duh lo mi 309 an awm a, an hriat chinah chuan sakhuana vang a ni.
June ni 28-ah khan vote nei duh lo hi mi 312 an ni a, July ni 2-ah chuan 309-ah a tla thla.
“Sakhuana vang tih hi kan hriat dan a ni mai a, vote nei thei reng eligible voter ni thei reng an ni chungin vote neih loh hi an thlang a ni,” joint chief electoral officer Ethel Rothangpuii chuan a ti.
2025 electoral roll list-a hming chuang an ni a, a hma chuan vote an nei, tun hnaia duh lo thar nia ngaih an ni.
Sakhuana vang han tih hian, hetiang hi tum dangah pawh a awm thin a, sakawlh number 666 nia ngai an ni thin. Tun tuma mite pawh hi chutiang chu ni tura ngaih a ni.
Vote nei duh lo te, Addhar nei duh lote an awm thin a, sakawlh chhinchhiahna a nih an rin avanga hetiang ti duh lo hi Mizoramah an awm nual a ni.