Sam Bankman-Fried kum 25 lung in tang dawn

Sam Bankman-Fried, crypto exchange hlawhchham ta FTX co-founder chu customer-te leh investor te bumah thiam loh chantirin kum 25 lung in tang tura tih a ni.
Billionaire hlui crypto champion puitu anga hmingthang chu kum 2022-a a firm a tlakchhiat hnuah a che chhe zui ta zel a ni.
A firm hlawhchham hmain customer-te sum billion tel tehmeuh ruksaka puh a ni a. Bankman-Fried legal team te chuan an conviction chu an appeal tur thu an sawi thung a.
“Kan thinlung a keh sawm a, kan fapa tan kan bei zel dawn” tiin a nu leh pa te chuan an sawi bawk.
A hmain kum 32-a upa Sam Bankman-Fried chuan mi tam tak ka ti hnual takzet tih ka hria a ni. “Kawng engkimah thilthleng avangin pawi ka ti a ni” tiin a chungthu relna tihchhuah hmain a sawi.
FTX chu a tlakchhiat hmain khawvela crypto exchange lian ber pakhat a ni a, Bankman-Fried chu business celebrity ni hman niin cryptocurrency tradeleh lei nan a platform chu maktaduai chuangin an hmang hman a ni.
Mahse kum 2022 khan sum deposit-ah harsatna a awm tia sawi lan hmasak ber niin a hnuah Bankman-Fried crime te chu lailanin a awm zui ta a ni.
Nikum khan New York jury te chuan wire fraud leh money laundering kalpuiah puhin thiam loh a lo chantir tawh bawk a, customer te atangin $ 8 billion chuang laksakin chung hmang te chuan property te leiin political donation te pe in leh investment dang tiah puh a ni zui a ni.
A hremna chhiar chhuah a nih hmain Judge Lewis Kaplan chuan Bankman-Fried chetdan dik lo sawi langin, trial neihnaah dawt a sawi a ti a. A comapny chuan miten sum an thawhkhawm te chu him taka dah aiah thil dangah an hmang tih a tawp dawn ruaiah a hre ve chauh a inti a ni tiin a sawi a.
“A dik lo tih a hria a, dan kalh a ni tih a hria a. Man a nih theihna hre chunga a thutlukna siam dik lovah a inchhir chungin mahse thiamlo a inti duh chuang lo” tiin judge chuan a sawi.
Bankman-Fried chuan customer ten hloh an neihah pawi a ti a, mahse, a thilsual tih lian takah inchhirna tawngkam pakhat pawh a hmang lo, tiin a sawi bawk.
A lung in tan hun tur kum 25 chu rei tak a ni chungin official government guidelines a zawm loh avanga a lung in tan theihna chu kum 100 chuang zawk daih niin vannei zawk taka ngaih a ni thung.
New York a federal prosecutor te chuan Bankman-Fried chu kum 40 tal lung in tantir an phut zawk a, dan zahna nei hauh lovin a thil sualtih chu a liantham lutuk a ni an ti a. Bankman-Fried team te chuan kum 6.5 aia tam a tan a rem lo tiin tan an khawh ve thung.
Tharum a hmang lo va, a thil sual tih tum khatna a ni bawk a, rilru lamah harsatna nasa tak neiin bankruptcy court hmalaknain customer te chuan an sum hloh eng emawzah an nei let leh dawn tiin tanfung an khawh ve thung a.
“A tuartute duh ber chu an sum neih let leh a ni a, an nei let leh ang” tiin Marc Mukasey a lawyer chuan sawiin, “Thawkrim zawk tura zilhin a pek let leh vek theih nan hma la turin tih ni zawk se” tiin a ngen a ni.
Federal prosecutor thin Mitchell Epner, tuna Rottenberg Lipman Rich lawyer ni ta chuan court thutlukna siam chuan a barakhaih tiin a sawi a, Bankman-Fried chu kum 13 hnu velah chuan chhuah zalen a ni thei mai dawn tiin a sawi.
Mahse Jennifer Taub, Western New England University law professor leh white-collar crime expert chuan hremna lekkawh chu a awm ang a ti thung a. “A kum zat hisapin leh hrem a nihna a inmil tawkin ka hria,” a ti ve thung.
Thutlukna a siamah Judge Kaplan chuan dam chhung lung in tantir chu a tul lo va, mahse, Bankman-Fried chuan nakin zelah dan a bawhchhiat tawh loh nana dang turin hremna tawk chu a hmachhawn tur a ni a ti a.
“He pa hian nakin zelah dan bawhchhiatna kalpui leh thei tur dinhmunah a ding thei a, chu chu thil tenau a ni hauh lo,” tiin a sawi.
Hei bakah hian Bankman-Fried chu a victim te compensate na turin $ 11 billion chu a pe tur a ni a ti bawk a. Sorkar chuan a asset hrang hrang te a chhuhsak tawh bawk.
Bankman-Fried chaun customer te chauh pawh ni lo a hnathawk hlui Caroline Ellision leh Gary Wang te a thian tha te trial neihnaa a laka testified tute pawh lawmthu a hrilh zawk a. “Thil tha leh mawi em em an siam chhuak a, theih tawp an chhuaha keiin ka lo paihbo sak a ni. Ni tin chu chuan inchhirin min siam a ni” tiin a sawi.
Judge Kaplan chuan Bankman-Fried chu maximum security prison a dah tura an tihloh tur thu sawiin a chhan ber pawh court chuan tharum thawhna lama hlauhawmah a ngai lo a ti bawk.
Bankman-Fried hma hian Crypto lam kaihhnawiha inbuman thilah Karl Sebatian Greenwood “Cryptoqueen” Ruja Ignatova tana thawk chu nikum khan OneCoin a $ 4 billion lai invest tura mi maktaduai chuang te bumnaah a inhnamhnawih avangin kum 20 lung in tang tura tih a lo ni tawh a.
Tun hmain inbunmna lian ber pawla ngaihah Bernie Madoff chu $ 46 billion Ponzi scheme a thiam loh chantirin kum 150 lung in tang tura tih a lo ni tawh bawk.