Sangha bawk hi…

Mizoramah sangha khawia eizawng (fish farmer) mi 22,661 an awm mek a. Mizorama dil zau zawng hi Hectare 6,367.58 a ni bawk. Chawhrualin farmer pakhat sangha dil zau zawng hi square metre 2809.92 a ni.
Kum 2024-25 khan fish farmer-te hian sangha metric tonne 7,152.16 an tharchhuak a. Farmer pakhat sangha dil 2,809.92 square metre-a zauah sangha Kg 315.61 zel thar ang a ni. Chumi awmzia chu sangha dil sq metre 8.9 (square feet 95)-a zauah sangha Kg khat zel thar chhuak ang a ni.
Hei hi fisheries department official website behchhana chhût chhuah a ni a. Hetih lai hian, nimina fisheries minister hova fisheries hmalaknate thlirhona neihah, website data nena tlema danglam hreta report tarlan a ni a; mahse, a inhlat lem loh avangin official website zawk hi rin a ni. Website-a tarlan loh, nimina pholan erawh pakhat a awm a, chu chu sangha dil tam lam — 3,207 tih a ni. Hei hi a dik a nih chuan, sangha dil zawng zawng belhkhawm zau zawng hi Hectare 6,367.58 tih a ni si a, sangha dil pakhat hi a zau duh dawn hle a ni.
Eng pawh ni se, data chu data lo ni se, Mizoram hian sangha tharchhuah kawngah hma chu kan sawn ve hret hret a, mahse sangha dil siamtutam dan te, sangha dil zau zawng leh kum khata tharchhuah zat te han en hi chuan, tanlak a tul hle tih a lang.
Website data bawk hi han en leh ta ila. Kum 2023-24 chhung khan fish farmer-19,809; fish pond area- 5,888.08 Ha; fish production – 5,470.89 MT tih a ni a.
Kum 2024-25 data atanga lo lang ta chu, fish farmer punna hi 2,852 a ni. Kum 2023-24 chhung hian chawhrualin farmer pakhatin sangha Kg 276.18 zel tharchhuak ang a ni a. Kum 2024-25-a mi pakhat tharchhuah Kg 315.61 nena a inthlauhna hi Kg 39.43 a ni. A tawi zawngin, sangha dil siama eizawng mi thar 2852 an awm belh hnua sangha tharchhuah punna hi a beitham hle a ni.
Tuna hriat theih chinah, India ram puma sangha tharchhuah dan ‘average aquaculture productivity’ hi ‘4.77 tonnes per hectare’ tih a ni a, hetianga chhut hi chuan Mizorama sangha dil zau zawng Hectare 6,367.58-ah hian sangha MT 29,927.626 a tharchhuah theih dawn tihna a ni a; chu chu tuna kan sangha tharchhuah let 4.1 a ni. Tun dinhmunah hian, kan mamawh zatve aia tlem hret kan tharchhuak niin fisheries dept lam chuan an chhut a, sangha dil zau zawng leh sangha dil siamtu tam dan ngaihtuah hi chuan, tuna kan tharchhuah let thum tal tharchhuak thei tur hi chu kan ni.
Heti zat fish farmer awmna, sangha dil zau zawng lah kilometre 63 bial zeta zau ni bawk si, sangha kan thar tam si lo hi, sangha dil nei lo fish farmer an tam vang te a ni thei mai ang em?