Sangha ei thatna leh pawi theih dan

Sangha hi chaw tha a ni tih chu kan hre theuh, mahse, sangha ei chungchangah hriattur pawimawh a awm a, a chang chuan sangha kan ei hian kan hriselna atan ‘risk’ kan lak tum a awm ve thei niin mithiam ten an sawi. Tun tumah hian Times of India health section sangha ei chungchanga hriattur pawimawh ni a an sawi te kan rawn tarlang e.
Sangha hi stroke laka min veng theitu pakhat a ni. Mithiam ten zirchianna an neih atanga an hmuh danin kar khata tum khat tal chawhmeh pui bera sangha ei thin te chuan a ei ve ngai lo te aiin stroke neih theihna risk 13%-in an nei hniam zawk. American Heart Association chuan kar khatah sangha vawi hnih tal ei tur niin an recommend tawh nghe nghe, hei hi a chhan chu sanghaa omega-3 fatty acids awm chu lung (heart) tan a that vang a ni.
Sangha thau hian omega-3 a pai hnem a, omega-3 chu lung lam hrisel nan a pawimawh hle a, chutih rualin ruhseh, diabetes, depression leh cancer thenkhat tan pawh a tha hle. Omega-3 hi a tlangpuiin cold-water fatty fish an tih ang chi sardines, herring, salmon, mackerel leh trout-ah te a tam lehzual.
Sangha ei hi a that rualin nuin nau a pai lai leh nau hnute a pek laia ei erawh a hlauhawm theihna a awm tlat. Sanghaah hian mercury chikhat methylmercury a awm thei a, hei hian nu chhula nau insiam lai nervous system a tibuai thei a, chutiangin nau hnute hne lai nervous system pawh a tibuai thei. Methylmercury hi shark, swordfish, king mackerel, tilefish leh albacore tuna-ah te a tam duh zual.
Dil sangha (farmed fish) pawhin rannung thahna hlo (pesticide) leh toxin dang an pai thei. A bikin salmon-ah a nih lehzual. Chuvangin farmed salmon aiin wild salmon thlan zawk tur a ni.