Sangha & Hriselna

On Oct 4, 2025 3 0

Sangha thau chu sam leh vun tana a that bakah natna hrang laka min veng theitu a ni.
Sangha thatna chungchang hi issue hmasa lamah kan rawn tarlang tawh a, mahse, a thatna dang a lo awm zel a, Times Of India health section-a sangha thatna an ziah te kan rawn tarlang leh e.
Thau leh mawm sawi hlek chuan hriselna lama mi vengva deuh chu an phawk nghal hra ang a, mahse, sangha thau chu a hrisel zawk tlat a, natna hrang hrang tan pawh damdawi a ni thei.
1. Sangha thau chu lung (heart) tan chaw tha a ni. Sangha thau-ah chuan omega 3 a awm a, chu chuan lung lam natna hrang hrang risk a tihniam thei. Sangha thau chuan LDL cholesterol (cholesterol chhe chi) level a tihniam a, HDL (cholesterol tha chi) level a tisang ve leh thung. Chuvangin, sangha thau chuan heart attack bakah thluaka thisenzam chat/block risk te pawh a tihniam thei a ni.
2. Intih cher i duh chuan sangha thau ei rawh, an tih tlat chu. Australia-a mithiam ten zirchianna an neih tharah sangha ei nasat hian hypertension (BP sang) leh obesity (thau lutuk) te a tizia awm thei niin an sawi. Intih cher duh tan regular taka sangha ei a tha niin an sawi bawk.
3. Thawkna lama harsatna nei, entir nan asthma ang chi te tan sangha thau chu damdawi tha tak a ni. Mithiam ten zirchianna an neihah naupang te chu an chaw pui berah sangha an rin tir a, group dang chu chaw pangngai an eitir thung. Chuta tanga an hmuh dan chuan sangha ei nasa te chuan asthma risk an nei hniam zawk niin an sawi.
4. sangha thaua omega 3 awm chu cancer tan damdawi a ni a, cancer common tak tak pathum- hnute, ril leh mipa serh cancer te a veng thei. Cell pangngai te cancer cell-a insiam tur a veng thei a, cancer cell te a tihlum thei bawk.
5. Sangha thau chuan sam a ti tle duh a, sam a tithang chak a, sam a tichakin sam tla nasa tur a veng thei. Sangha thauah hian protein a tam a, chu chu sam tan a tha hle bawk.
6. Sangha thau chuan vun khawro tur a veng thei a, vun a ti lang êng thei. Vun lama harsatna hrang hrang- eczema (vun a thakin a lo pan thei), psoriasis (vun khawro sen deuh tiak), baka vun thak leh vun lam natna hrang hrang tan a tha hle.
7. Nu naupai lai tan sangha chu chaw tha a ni, sangha thaua DHA awm chu nu pumchhunga naute mit leh thluak insiam mek tan a tha hle. A hun hmaa neu neih (premature birth) leh nauchhiat tur te pawh a veng thei.