Kum 16 hnuah zirna in a puitling zo lo? PAC-in thildanga hman tangkai a rawt

Mizoram Tourism Department-in State Institute of Hotel Management (SIHM) din tura hma a lakna kal mek chu Public Accounts Committee (PAC) chuan ngun taka a chhuichian hnuah puitling zo dawn lova ngaiin, SIHM building, Bung Bangla ami chu thil danga hman \angkai ni zawk se tiin rawtna a siam.
PAC hian, Mizoram Legislative Assembly Session hnuhnung ber August ni 27, 2025-a neiha Sixth Report a theh luhah khan he rawtna hi a tarlang a ni.
Mizorama hotel management zirna in din tur hian kum 2006 atangin hma lak tan a ni a, kum 2007-ah SIHM building sakna tur cheng nuai 1000 chu sawrkar laipuiin a sanction a. SIHM building sak hna hi Mizoram PWD-in 2009 atanga thawk tanin 2013-ah zawh fel a ni a, May 20, 2015-ah Mizoram Tourism Department kutah hlan a ni.
Tourism Department hian a taka SIHM kalpui (functional) a nih theih nan Mizoram sawrkarah thawktute lakna tur rawtna ‘proposal for post creation’ tum li, SIHM building sak laiin tum hnih, sak zawh hnuah tum hnih an theh lut a; mahse, sawrkar chuan Tourism department rawtna hi tun thlengin a la tipuitling thei ta lo a ni.
Tourism Department rawtna ang chuan SIHM-ah hian thawktu 32 mamawh a ni a, mahse sawrkarin sum lama harsatna a chhuanlam avangin thawktu zat hi 19-ah tih hniam a ni leh a; chuti chung pawh chuan sawrkarin a remtihpui thei lo; he rawtna pathumna ngaihtuah hun lai hi 2015 kha a ni.
PAC Sixth Report-a a lan dan chuan, Tourism department rawtna palina chu April ni 22, 2019-a Council of Ministers thukhawm chuan a pawm a. Department-in post 32 atana Recruitment Rules a buatsaih chu DP&AR(GSW) lam chuan lo endikin, siam that ngai laite pawh tum engemawzat siam that a nih hnuah Re-draft RR theh luh leh a ni a, DP&AR(GSW) pawmpuina chu tun thleng hian nghah a la ni ta a ni.
SIHM building hi sak zawh a nih hnuah hun rei tak luah lum lohvin a awm zui a, thawmthat ngai a awm tak avangin PAC rawtna angin Bulding Committee din a ni a, building thawm thatna tur estimate cheng nuai 201.7 siam chu sawrkarin a pek theih tak loh avangin Tourism Department chuan anmahni budget head ‘minor works’ atanga cheng nuai 11.31 sengin thawmthat hna hi an thawk a ni.
Mizoram sawrkar a chet theih tak loh avangin SIHM outsource dan tur hi hun rei tak chhung dap kual a ni leh a, chutah pawh chuan beisei tur a awm rih lo a ni.
Hemi chungchangah hian PAC chuan, Tourism Department-in State Institute of Hotel Management din tuma hma a lakna chu hlawhchhamah ngaiin, SIHM building chu department dangin thil dangah hmang tangkai mai se tiin rawtna a siam ta a ni.