Sanghal thih chhan ASF tih finfiah

On Jan 20, 2026 0 0

Sanghal thih chhan ASF tih finfiah
Tun hnaiah Thentlang ramah sanghal ruang hmuh a ni a, vety doctor te’n African Swine Fever (ASF) an vei tih an finfiah.
Thu dawn danin, nikum December thla chawhma lam atang khan Thentlangah hian nghal rual an lut a, chumi hnuah ramhnuaiah sanghal rual an hmu ta zeuh zeuh a, AH&Vety department lamin an enfiah ta a ni.
AH&Vety department lam chuan January ni 16 khan sanghal hian ASF an vei tih an finfiah thu The Aizawl Post an hrilh a, bone marrow sample lain an finfiah tih an sawi.
Thentlang lam chuan sanghal ruang hi hmun khata tam deuh lo awm a nih loh thu an sawi a, hmun hrang hranga an hmuh hi 15 vel a nih thu an sawi. An khaw ramah hian thal intan dawn velah sanghal hi an lut thin tih an sawi a, tuna mi hi khawi lam atanga kal nge an nih an hriat loh thu an sawi rualin Thinglian lam atanga kal nia ring an awm thu an sawi.
Sanghal ruang hi a then chu a tawih tawh a, a then erawh thi hlimchhawn te pawh an hmu. AH&Vety department hian a thling lain an endik a ni.
ASF hi vawk chauh ni lovin sanghal leh phivawk pawhin an vei thei a, kum hmasa lamah pawh Mizoramah sanghalin ASF hi an vei tih finfiah a lo ni tawh thin.
2021-ah khan Thenzawl rama Mat lui kamah sanghal ruang an chhar a, ASF hi finfiah a lo ni tawh. 2024 August ni 29 khan Lunglei district-a Bungtlang West-ah sanghal ruang engemaw zat an hmu a, AH&Vety department-in enfiah tum mah se endik theih loh khawpin a lo chhe hman. Nikum khan Saipum ramah sanghal ruang hmuh a ni a, hei hi AH&Vety department-in endikin, September ni 24-ah ASF a ni tih finfiah a ni.