SARAS Fair-ah nuai 50 chuang lei Thil siam thenkhatin fak a hlawh lo

On Nov 3, 2025 8 0

SARAS Fair-ah nuai 50 chuang lei
Thil siam thenkhatin fak a hlawh lo
Ni 4 awh 11th Sale of Articles of Rural Artisans Society Fair (SARAS Fair) leh Self Help Group Mela 2025 Aizawl Lammuala neih chu Inrinni khan a tiak a. Mahni kutchhuak photuten cheng nuai 54 chuang man an hralh nia hriat a ni.
Kuthnathawktu hmeichhiate thil siam chhuah zawrhna hmunpui SARAS Fair hi tun tum hi Mizoramah a vawi 11 neihna a ni a. Mizoram Rural Livelihood Mission (MzSRLM) leh Urban Development & Poverty Alleviation department tangdun buatsaih a ni. MzSRLM hnuaia self help group (SHG) ho thil siamchhuah, puantah leh la lam bakah thiamhnang leh thing hmanga thil siam, thei leh thlai sawngbawlna atanga ei leh in tur thil siam chu lei theiha phochhuah thin a ni.
Fair-ah hian khawpuia SHG leh thingtlanga SHG an inphochhuak ve ve a. Stall pangngai 102 bakah ei leh in nghal theihna food stall 8 siam a ni. Heng zingah hian MzSRLM hnuaia Block 28 chhunga khaw 71 atangin SHG member 98-in stall 52 leh food stall 2 an hawng.
Tun tumah hian a vaiin Rs. 54, 35,000 chuang an thil pho chhuah an hralh tih sawi a ni a. Kum 2024 khan Champhaiah Hnahsin Kut nen buatsaih kawp niin, hemi tum hian Rs. 57,85,197 hu an hralh nia chhut a ni. 2024 December khan Aizawlah SARAS Fair hi buatsaih leh niin, RD Block 28 atangin SHG member 100 chuang an tel a, hetah hian Rs. 4,027,579 hu an inhralh bawk.
MzSRLM hotute chuan kumin chhung hian Lungleiah SARAS Fair leh SHG Mela hi buatsaih leh hman an tum tih an sawi a ni.
Hetihlai hian tun tuma an thil siam phochhuak zingah SHG thenkhat thil siam sawisel kai deuh a awm tih thu dawn a ni a. A bikin pickle siamtu zingah beisei ang pha lo deuh, hlawk tum lutuk an awm nia ngaih theiha thil siam an awm tih a chhimtuten an sawi khawm leh atangin thu dawn a ni.