SASCI hnuaia hna pek tawh cancel sak kan nei lo – CM

Sawrkar laipui atanga dawn SASCI (Special Assistance to States for Capital Investment) hnuaia hna thawk tura sawrkar hmasa in work order a lo pek tawh chu tumah hnuhlet sak leh tih tawp sak an nei loa, hna thawh erawh a tha lo hlawm hle tih chief minister Lalduhoma chuan a sawi.Assembly Session-ah SASCI hnuaia hna sem tih khaihlak awm nia ngaih leh sum lapse hmaa thawh zawh theih dawn leh dawn loh chungchang zawh a ni. A chhangtu PWD minister Vanlalhlana chuan SASCI hnuaiah sawrkar laipuiin Mizoram hnenah cheng vaibelchhe 500 a pe a, PWD-in a chang tam ber a, department dang 5 dangin an chang ve tih a sawi.
MLA inthlan hnaih tawh lam, 2023 October 6-ah sum hman phalna pekchhuah a nih chauh avang leh inthlan puanin a zui a, model code of conduct (MCC) hman a nih tak avangin SASCI hnuaia hmalakna tihtawp a ngai a, MCC hlih hnu ah a dinhmun an zirchiang ve leh nen, hun a lo liam thui ta deuh tih a sawi a ni.
Chief minister duhdanin, work order pek hman chu tumah laklet sak an ni loa, chutihlaiin, inthlan dawn hnaihah campaign fund ang deuhin, contract la hmu ngai lote hnena pek nia ngaih theiha pekchhuah a nih avangin a phuailuai lai a tam hle tih Vanlalhlana hian a sawi. “Capital investment a nih anga assets siamnaa hman tum aiin, inthlana chak tuma tute emaw pawisa pek va tumna ang kha ngaihtuahnaah a lian a ni ang,” a ti.
SASCI sum hi March 31 ralhmaa hman zawh tur a ni a, 1st instalment-a pekchhuah cheng vaibelchhe 266 chhungah hian tuna hnathawh tawh leh work order pekchhuah tawh hi khunglen hram an tum tih a sawi. Hna tan tawh leh la tan lo an awm a, work order hum tawh hrim hrimin an thawh vek theih nan sum awmsa hi dah an tum tih sawiin, “A chhan chu, 2nd instalment hi kan hmu angem tih sawi theih a ni lo,” a ti.
House leader Lalduhoma sawi danin, SASCI hnuaia work order hum tawh pakhatmah cancel an nei lo a. Mi pakhat hmingin hna hi hmuh a ni a, an hnuaiah sub contract 10-20 an intlar. Hna tan tawhte pawh an thawk tha loa, an thawk muang bawk.
Sawrkar kum kal mekah sum pekchhuah tawh sa hi ‘lapse’ tur a nih tawh avangin thawk hman lo tan chuan tih ngaihna an hre lo tih sawiin, “Utilisation certificate kan thehlut hleithei dawn lo a, 2nd instalment a beiseiawm loh sa. Kan ui viau chungin a thawktuten an thawh miau loh chuan,” a ti.
PWD EE zingah tawngkaa hna thawk lo tura contractir-te tih an awm nia House member-te sawi chu chhangin chief minister chuan, “Thawh tir vek tur a ni a, pakhatmah khap an ni lo. Thawk chak se kan duh zawk,” a ti. SASCI chu guidelines hran nei, state fund hnuai ami a nih loh thu leh thawk zawk lo na na na UC pek an tum loa, dawt sawi an tum lo tih sawiin, “An thawh hman miau loh chuan hunin a liampui ang tih kan hlauthawng. A quality a that loh phei chuan bill pek kan tum si lo,” a ti.
Sawrkar kum kal laia SASCI kaltlanga sum hmuh hman dan tha lo chuan sawrkar kum thara a thara SASCI sum an dawn tur chu a nghawng dawn lo a nih a rin thu sawiin, “Cheng vaibelchhe 500 min rawn pe tawh e,” a ti.