Saudi Arabia-a lirthei insua thi zingah Indian 15 tel

Saudi Arabia-a lirthei insua thi zingah Indian 15 tel
Saudi Arabia-a bus leh trailer insua mi 15 thi zingah Indian pakua an tel tih Nilaini khan Jeddah-a Indian consulate chuan a sawi a, thi chhungte hnenah pawh chanchin hrilhin an buaipui zui zel tih an sawi.
Hliam tuar mi 11 zinga pahnih pawh Indian an ni a, Telangana mi niin an sawi a, damdawi inah enkawl mek an ni tih an sawi a. Lirthei chetsualna hi Saudi Arabia khawthlang lama Jizan bul, Yemen nena an inrina bul lawka Pathiannia thleng niin an sawi bawk.
Jeddah-a Indian consulate hian lirthei insutnaa Indian an thih tel thu hi X-ah an tar lang a. Consulate chuan thi chhungte tan an tih theih ang zawng zawng an tih thu leh tual chhung thuneitute nen pawh an inpuih tawn thu an tar lang tel.
“A tuartu chhungkuate kan tawrhpui tak zet a, hliam tuarte pawh dam leh thuai turin duhsakna kan hlan a. A tul anga biakpawh theih turin helpline kan siam nghal bawk,” an ti.
External Affairs Minister S Jaishankar pawhin chetsualna a thlen thu leh Indian thi an awm tih a hriat thu X-ah a tar lang a. “A tuartu chhungkuate nena inbepawl tawh, Jeddah-a kan Consul General nen pawh kan inbia a. He vanduaina thlengah hian a theihtawp a chhuah tih min hrlh a ni,” a ti.
Lirthei chetsualna Mecca chhim lam, Asir province-a Wadi bin Hashbal region-a thleng niin inhlawhfa 26 phur bus leh trailer an insu a. Thi zingah hian Nepal leh Ghana atanga inhlawha awm mi paruk an tel a. Thuneituten insutna thlen dan leh a chhan an chhui nghal mek.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More