Sava bo hmu theite mitvar man pek tiam

Aizawl Sahuan atanga sava bo chu hmuh a la ni loa, zawn mek zel a ni. Forest department chuan a hmuhna tura pui theitu hnenah mit var man pek a inhuam tih a sawi.
Dan phal loha ramdang atanga Mizorama ken luh sava chi hnih – Hyacinth Macaw leh Vulturine Parrot, July 1 zana Aizawl Sahuana an dah luh tak leh, Sahuana awmsa Rufous Hornbill chu July 4 zing lam khan an bo tih hriat a ni a, rukbo a nih rin a ni. Hemi thilah hian Environment Forest & CC department hotute chuan Sairang Police Station-ah FIR an thehlut a ni.
The Aizawl Post-in a zawhchiannaah Sairang PS office in charge Lalfakawma chuan Sahuan atanga sava bo chungchangah mi engemawzat thu an zawhfiah tawh a. Tun dinhmunah rukrute chhuichhuahna tur khawp engmah thu hriat an la nei lo tih a sawi. Theihtawp chhuaha zawn hna an la thawk mek thu leh rukru zawn chhuah ngei an tum thu a sawi.
Hetihlai hian Aizawl Wildlife Division-a deputy conservator of forest PC Laltanpuia chuan thuchhuah siamin, “The Mizoram Reward for Detection of Forest and Wildlife Defence Scheme 2019” in a phal angin, rukru chhuizuina atana tangkai thei tur leh man chhuah theihna tur khawp information pe theite hnenah lawmman atan Rs. 20000 an pek tur thu leh an nihna (identity) an thup tur thu a sawi a ni.