Ball ‘head’ thluak tan a pawi thei!

Football khelh chuan ball heading tul chang a awm thin, mahse, hetianga ball ‘heading’ nasat lutuk hian thluak a tibuai thei niin mithiam ten an sawi tlat mai.
Yeshiva University-a Albert Einstein College of Medicine leh Montefiore Medical Center a mithiam te chuan diffusion tensor imaging (DTI) hmangin, football khel thin (eizawn nana hmang ni lo) mi 38-ah zirchianna an nei a, an kum chawhrual chu kum 30.8 niin, an naupan lai atanga football khel thang tak te an ni hlawm.
Heng football khel thin te hi ball an head nasat dan te uluk takin an teh a, heading tinasa deuh leh nasa lo deuh te thluak chu an endik ta a ni.
Mithiam te chuan ball head nasa ho thluakah chuan hliam an hmu deuh vek a, heta an thluak hliam dan hi concussion patient, traumatic brain injury (TBI) te pawh an ti, nen a inang khat niin an sawi.
Mithiam te chuan kum khata ball vawi 1,000 atanga 1,500 vel ball head chu a pawi thei tawh niin an sawi a, chumi pelh chinah phei chuan thluakin a tuar nasa tawh hle niin an sawi bawk.
Zirchiannaa an hotu Michael Lipton chuan, “Kum khata ball vawi 1,000 atanga vawi 1,500 vel head chu inkhel ngai lo tan chuan a tam hmel viau ang a, mahse, inkhel nasa tan chuan nikhata ball vawi 5 vel head ang chauh a ni. Vawi hnih khat ball head mai te chu a pawi lova, thluaka nerve fibre tichhe thei tur pawh a ni lo, mahse, head nawn deuh awn awn hi a pawi ber chu a ni,” a ti.
Hetianga ball head nasat hian thil kan hriat theihna leh kan thiam theihna (cognitive) a tichhe thei niin an sawi. He zirchianna chungchang hi Radiological Society of North America (RSNA) annual meeting, Chicago-a neihah an chhawpchhuak a ni.