Sawhthing chingtu mawhpuh loin mawhphurhna la ngam zawk se

Sawhthing chingtu mawhpuh loin
mawhphurhna la ngam zawk se
Tunhnaia khaw pahnih atanga state pawna thawn tur sawhthing lei chungchangah minister pakhatin sawhthing chingtute dem zawnga thu a sawi leh, a buaipuitu sawrkar lam aiawh mawha dah loa kuthnathawkte mawh a phurh tir daih chu pawi an tih thu Congress party chuan an sawi a. An fimkhur pui tawk loh avangin moral responsibility la ngam tur zawk an ni tih an sawi.
MPCC Farmer Department chuan 2025 February 10-a chief minister hoa ‘sales letter’ inhlan, tripartite arrangement kha Mizoram State Rural Livelihood Mission (MzSRLM), Ropuiliani Farmers Producer Company Ltd (RFPCL) leh Reliance Retail Ltd inkar a ni, tiin, February 24-a ZPM party inkhawma minister Prof. Lalnilawma’n Chamring leh Sailam atanga sawhthing lei chungchanga sawhthing chingtute dem zawnga thu a sawi chiam mai chu pawi an tih thu a sawi.
RFPCL chu MzSRLM hnuaia society /self help group nia hriat a nih thu leh MzSRLM chu Rural Development department hnuaia Mission a nih thu MPCC Farmer Department chairman Lalrinliana chuan sawiin, “Engvangin nge sawhthing an thawn chhuah tur hi an thawn chhuah hma in MzSRLM hian uluk taka a endik loh. An minister berin eng vangin nge a department mawh phur tir loa, farmer-te mawh a phurh tir; Chamring leh Sailama sawhthing chingtu chhungkaw 55-te rilru a na hle tih hriat a ni a. Hetiang thil a lo thlen takah chuan a deparment chan MzSRLM te fimkhur tawk lohna hi minister mawhphurhna a ni a, moral responsibility a la tur zawk a ni,” a ti.
ZPM sawrkarin a intiam angin sawhthing chingtute thar zawng zawng a bo a bang awm loin rate bituk kg ah Rs.50 in lei sak vek se tih chu Congress party duh dan a ni a, eng party pawh sawrkar se kuthnathawktute dawmkanna programme reng reng chu Congress party chuan an policy a nih angin a thlawp vek tih a sawi a. Chutihlaiin tuna sawrkarin a lei tan danah ngaihthat lohna a awm thei dawn tih a sawi.
February 20 atanga Chhingchhip Cluster-a lei dan tur an ruahmannaah a thawhkhatna mai mah ni se, khaw 14 atanga quintal 1080 chauh lei tura ruahman a nih bakah khaw thenkhatah phei chuan quintal 20 lekte, a tamna ber khuaah quintal 100 lei tura ruahman kha sawhthing thartute a ti beidawng ang tih a hlauhawm a; chief minister-in February 21-a Assembly House-a sawhthing chungchang a sawite khan sawhthing thartute tihnual lo hram se tih chu Congress party duh dan a ni tih a sawi bawk.
Hmunphiah chungchangah vanneihthlak takin ruah a la tla lo hlauh chungin, February piahlamah chuan duhthusamin a lei tlak tawh dawn loh tih Lalrinliana hian a sawi a. Tun dinhmunah a thartuten remchang an hriat ang angin an tiral nia a lan thu a sawi. Congress party chuan kuthnathawktute khaichhuah chu a policy a ni reng a, chumi atan chuan theihtawpin hma a la a. Kum 2028-a sawrkar-na a chan hunah pawh kuthnathawktute khai chhuahna turin NLUP changtlung zawk kalpui a tum tih a sawi a ni.
Kum 1994 Congress sawrkar laia kuthnathawktute thlai thar hralhchhuah chungchanga middle-men te lo inrawlh nasa lutuk thinin harsatna a lo siam thinte vensakna atana dan siam – The Mizoram Agricultural Produces (Restriction on Movement) Order 1994 chu tunlai hian kuthnathawktute rahbehna ang lek leka sawi a hlawh tih MPCC Farmer Department hruaitute hian sawiin, iskut, sawhthing, hmarcha, chhawhchhi leh la (cotton) chingtute rate tichhe vek duh khawpa middle man inrawlh thin venna atana dan siam niin, kuthnathawktute a veng tha hle a. Kum 1998-a MNF sawrkarin vety, sericulture leh forest sector lam belhin a tiphuisui lehzual tih an sawi a ni.