Sawhthing lilam nan whatsapp leh email hmang

Mizoram sorkarin sawhthing lei tur a zawng a, hemi atan hian whatsapp leh email te a hmang thin.
Mizoram sorkarin a thartute hnen atangin sawhthing a lei a, chu chu sawhthing hmanga sumdawngte hnenah a hralh leh thin. Sorkar hian a hralh hna hi auction (lilam) hmangin a kalpui a, chu chu whatsapp leh email hmanga tih a ni.
Budget Session neih mekah Sertlui bialtu Lalrinsanga Ralte zawhna, sorkarin sawhthing a lei sa, Secondary Collection Centre leh Buffer Stock Centre-a mite hralh nan auction tih a nih thuin agriculture minister PC Vanlalruata’n a chhang a, khawi website leh chanchinbuahte nge an chhuah tih chu, whatsapp leh email hmanga tih a nih thuin a chhang a ni.
“Sawhthing lei thin sumdawng leh company hnenah whatsapp leh email hmanga theh darh a ni,” a ti.
2025-ah khan mi 10-in an lei thu a sawi a, minister-in House a hrilh danin, a lei tlawm berin kg-ah Rs 3-in, a lei to berin kg-ah Rs 12-in an lei.
Minister chhannaa a lan danin, mi paliin kg-ah Rs 3-in an lei a, mi pangain Rs 10-in, pakhatin Rs 12-in a lei.
Sawhthing leitu mi 10 zinga paruk chu state danga mi an ni a, Mizoram mi pathum; address lang lo, a hming erawh Mizo hming pakhat a awm.