Sawhthing qtl 60000 chuang lei tawh Thawh 2-naah SCC inzawnchawp ngai
Kuminah Mizoram sawrkarin sawhthing a lei a. April ni 1 thleng khan sawhthing hi quintal 62887.4 a lei tawh. Mizoram sawrkar hian kumin February 20-ah sawhthing hi a lei tan a, March 15 thlengin a lei tiin a sawi theih. March 15 hnu-ah hian hmun thenkhatah la lei tho mah se tam thama lei chu March 15 atangin an chawl rih.
Sawhthing hi primary collection centre-ah an lei a, chuta tangin secondary collection centre-ah phurin, chuta tang chuan buffer stock-ah phurh thlen a ni.
A lei hna thawkte’n an chhinchhiah danin, April 1 thlengin buffer stock-ah quintal 24298 phurh thlen tawh a ni a, buffer stock hi sawhthing lei duhte’na an leina hmun a ni a, quintal 5679.1 hralh tawh a ni. Quintal 18618.9 a la awm.
Sawhthing leitute hian secondary collection centre ah pawh an lei a, an leina man (rate) hi a inang lo; a hmun hlat dan azirin a inang lo tih thu dawn a ni. Kg-ah Rs.20 te, Rs.24 ten an lei a, hriat theih chinah a lei tlawm ber chuan kg-ah Rs 18-in an lei. Kg-a Rs.19-a lei an awm bawk. Sairang-a buffer stock-a leitute chuan kg-ah Rs.30-in an lei. Sawhthing lei hna hi an la tan leh tak tak lo a, lei sa a hlui tawh a, a dahna hmun hi tihruah pawh a ngai nia hriat a ni.
Sawhthing lei thawh hnihnaah chuan secondary collection centre (SCC) in lei tur an inzawn chawp a ngai tawh dawn a, sawhthing an hralhna hi kg. ah Rs.50 a tling pha lo a nih chuan, sawrkarin a tlin lohna chin zawng support price a pe dawn.
Sawrkar thuchhuak ang chuan, sawhthing lei thawhhnihna hi tan thuai a ni dawn a. 2nd phase-ah hian SCC hi anmahni kea ding tura beisei an ni tawh. District Agriculture Marketing Committee-in auction chhuah tawh loin, SCC-ten an chhuah anga, sawhthing leitu – buyer pawh anmahniin an zawn a ngai dawn.
SCC-in sawhthing an hralhna rate azirin sawrkarin kg. ah Rs.50 a tlin lohna zat hnawhkhatin support price a pe dawn a. SCC enkawltu leh buaipuitute chu hemi atan hian training pek vek an ni tawh a ni.
April ni 1 thlengin sawhthing hi:
8 Quintal 62887.4 lei tawh a ni
8 Buffer stock-ah quintal 24298 phurh thlen a ni
8 Buffer stock a\angin quintal 5679.1 hralh tawh a ni
8 Secondary collection centre-ah qtl 12539.84 a la awm