Sawhthing zirtu team
Chief minister chuan, ‘sawhthingin ram leilung a tih chhiat dan zir tur team’ sawrkarin a din thu a sawi a; permanent farming zawnga kalpui tura ruahman mek a nih thu a sawi bawk.
Inthlan campaign lai khan ZPM party chuan, an sawrkar chuan kum thum chhung sawhthing lei phawt an tum thu an lo sawi tawh a; chuti a nih chuan, kum 2027 thleng an lei dawn tihna a ni awm e.
Ram zimte kan nei a, a mi chengte eizawnna lian ber pawh thingtlang lo neih a ni. Kum tin ramngaw thiat zawnga eizawnna a nih avangin ram a heh a, environment a khawih chhiat avangin sik leh sa a lo danglam phah a, khaw lum kan tuar tan a, tuihna a lo kang zel bawk a. Ramngaw thiat zawnga loneih (shifting cultivation) bansan zawnga eizawnna dang din tumin sawrkarin hma a la chho a, MIP, NLUP, SEDP etc. kalpui a ni a. Hengte hi policy tha tak tak ni mah se, election oriented ang deuh leka kalpui a nih thin vang ni maw, a nihna tur angin kan hlawhtlinpui ngai lo a tih theih awm e; chu chu a dik tih kan tun dinhmun hian a nemnghet mek bawk. A lehlamah chuan, sum chang thlai chin lam kan intih hmuh tak zel avangin thingtlang lo neih kan bansan hret hret phah ve tho a, kan tangkaipui lo bik lo.
Sawhthing lamah kan tuan leh a, inthlan dawnah sawhthing tawktarh danin a zir deuh bawk a ni ang, sawrkar thar a pian phahna chhan (factor) lian berte zing ami a ni pha awm e. Sawhthing ching ngai lote pawhin sawhthing an ching ruih ruih a, a hmaa thingtlang lo neih avanga ramngaw chereu chak kan tih thin aia nasa khan kan ramin a tawrh phah chho leh mek ta a. Mithiam ten an sawi danin, sawhthing chinna hnu ramah hian kum tam tak chhung thlai dang a chin theih tawh loh an ti nghe nghe. Chuti a nih chuan, sawhthing ngei ngei pawh chu a chinna hmun ngaia chin tluk tluk reng theih a nih dawn loh chuan, sawhthing hian kan ram leilung chu hun rei lo te chhungin a tichhe vek thei mai dawn tihna a ni ber awm e.
Chu chu zirchian kan tum leh mek a ni a, inrenchem a lo ngai bawk nen, foreign ram tlawha sum tam tak seng kher lova zir chian dan hi a awm turah i ngai phawt teh ang.