Sawmtea’n Bangkok-ah Honorary Doctorate Degree a dawng

Sawmtea’n Bangkok-ah Honorary Doctorate Degree a dawng
Mizo mipa gospel singer hriathlawh ber te zinga mi Sawmtea Chhangte chuan Inrinni kalta kan Union Biblical Seminary Yangoon & I-Hope University, USA hnen atangin ‘Doctor of Music’ degree a dawng a, he chawimawina hi khawvel hmun hrang hrang Zofate zinga zohnahthlak tawng hrang hrang hmanga zaia a rawngbawlna leh Zofate inpumkhatna leh inunauna atana rimawi hmanga a ke penna avangin Bangkok, Thailand-ah hlan a ni.
Sawmtea hi Mizo gospel music khawvela huhang nei lian tak a ni reng a, a theihtawpa Pathian faka zaia rawngbawlna nei thin a nih piah lamah, Zofate inpumkhatna atan rimawi hmangin a thawh hlawk hle a, Mizoram pawn leh India rampawn thlengin hmun hrang hranga Zofate te awmnaah rawngbawlna neiin a lo pen chhuak tawh thin a, heng a fehchhuahnaah te hian Zofate inunauna atan a theih ang angin ke a pen bawk thin a ni.
Sawmtea chuan a Honorary Doctorate Degree dawn chu phu lo a intih thu leh chutihruala hetiang chawimawina ropui tak a dawng chu lawmawm a tih si zia te sawiin, “He degree hi ka phu lo ka ti a, hetiang ka dawng hi ka inthlahrung em em zawk a. Keima lamah engmah ka nih loh zia ka inhria a, hetiang chawimawina ropui dawng tur phei hi chuan ka tlin loh zia pawh ka inhrechiang. Mahse, Pathianin min khawngaih em a, amah faka theihtawpa ka zai leh hnam inpumkhatna atana ka ke pen ve chhun te mal a sawm a ni tih ka hria a, phu lo inti chungin, lawm takin ka dawng ta a ni,” a ti.