Party thenkhatin anmahni thunun tura an dinte thu an awih duh loh chungchangah an sawrkar hmaa thunun theih loh te chu sawrkar hnu ah thunun theih an nih a ring lo tih Congress president Lalsawta chuan a sawi.
-- Advertisement --
Zirtawpnia Congress Bhavan-a political session-ah Lalsawta chuan sawrkar loh lai chu sawrkar huna an zia tur lantir hun a ni tiin, “Party thenkhat chuan anmahni thunun tura an dinte thu an awih duh loa, ‘kan sawrkar huna kan tih tur alawm kan sawi’ tiin sawimam an tum. Mahse, sawrkar hma pawha thunun theih lohte hi sawrkar hnu ah tuma’n an thunun lo ang. Kan sawrkar huna kan awm dan tur ang tak hian tun hunah hian kan awm tur a ni,” a ti.
Sum hmachhuana MLA inthlan hmachhawn tum an awm laiin, Congress party chuan sum seng tlem chunga sawrkar a theih tih an hria a, Pathian rinchhanin an inbuatsaih tih Lalsawta hian a sawi. Congress party hotute pawh inthlan kaihhnawiha sum an sen tam loh na’n thawk tan a, candidate-te phurrit siamsak lo zawnga campaign turin a chah.
“Mi thenkhatin an sum ngah ringa tlin an tum hi mipuiin kan hnawl chhan a ni zawk dawn. Sum hmachhuana politics khelte hi che thei miah loin siam ang u,” a ti.
Sawrkar hnathawkte tha taka enkawl leh mipui tana tangkai lehzual tura remruat chu thil tih theih a ni tih Congress president hian a sawi a. Provisional employee-te dinhmun tur pawh uluk taka ngaihtuahin, tuna an dinhmun aia tha zawka kalpui dan an ngaihtuah dawn tih a sawi a ni.