Mizorama cancer veite enkawlna hmunpui ber Mizoram State Cancer Institute Zemabawk chu tun aia thuamtha turin Mizoram sawrkar an ngen tih ZPM Thalai chuan an sawi.
-- Advertisement --
ZPM Thalai Hqrs. hruaitute chuan Zirtawpni khan Mizoram State Cancer Institute (MSCI) hi tlawhin a dinhmun an enfiah a. Khawl tha tak tak leh thawktu inpe tak tak a nei chu lawmawm an tih rualin, heng khawl hian enkawltu, technician 10 tal a mamawh laiin 6 chauh an awm a, thawktu indaihlohna avang hian heng khawl hi an theihna (capacity) anga hman an la ni lo chu tih sawiin, sawrkarin cancer veite hmakhua ngaia technician dah belh thuai turin an ngen tih a sawi.
MSCI Block-II building, lânga damlote chemotherapy an tihna hmunah wheelchair-a innawr theihna kawng (ramp) a awm loh avangin damlo chau tak takte step-ah puak an ngai thin tih ZPM Thalai hian sawi bawkin, he building-a lift siam chu hman thuai a nih theihna’n chak taka hma la turin thuneitute an ngen tih a sawi a ni.
“Mizoram hi cancer vei tamna state kan nih avangin cancer veite enkawlna tha kan neih a tul hle a, khawl leh mithiam kan neih tawk loh avanga sum tam tak senga harsa taka phaia inenkawl tura kan kaltir thin hi kan tihtlem theihna’n sawrkarin nasa zawkin hma la se kan duh a ni,” ZPM Thalai president Dr C. Lalrammawia chuan a ti.