Sawrkar hnathawh that avangin lawmman vbch.350 kan beisei – Chief minister

Sawrkar hnathawh that avangin
lawmman vbch.350 kan beisei
– Chief minister
Mizoram sawrkarin SASCI 2025- 2026 hnuaiah hma a lak that avangin sawrkar laipui atangin lawmman cheng vaibelchhe 350 vel hmuh an inbeisei mek tih chief minister Lalduhoma chuan a sawi.
Chief minister-in a social media account-a a tarlan danin, SASCI 2025- 2026 a Mizoram-in hna a thawh that avanga lawmman a dawn tawh chu – Commerce & Industries (Mining) ah cheng vaibelchhe 100, Agriculture-ah vbch. 60, Toursim-ah vbch. 250, Land Revenue & Settlement-ah vbch.30, Finance-ah vbch. 199 niin, Finance-ah hian lawmman vbch. 350 beisei mek a ni tih a sawi.
Hetihlai hian Power & Electricity department hnuaiah 2024 May atanga kumin January inkara Mizoram sawrkarin kawlphetha chhit man a pek that avanga lawmman a dawn zawng zawng chu cheng vaibelchhe 7 chuang a tling tawh tih a tarlang bawk.
“Ramin hma a sawn zel theihnana theihtawp chhuah rengtu sawrkar hnathawkte chungah lawmthu ka sawi a ni,” chief minister hian a ti a. 2024 March-a Assembly Session-a zawhna chhannaah P&E minister chuan, power man bat zat chu cheng vbch. 144 chuang a nih thu a sawi tih sawi chhawngin, “May 2024 khan bill pek that lawmman cheng singkhat vel an dawng tan a, hemi hnu hian thla tin lawmman hi an dawng chhunzawm ta zel a, May 2024 atanga January 2026 kara kawlpheta chhit man an pek that avanga P&E department-in lawmman a dawn zawng zawng chu vbch. 7 chuang a tling tawh a ni,” a ti.