Sawrkar hnathawkte leh hmasawnna …

Nimina Civil Services Day lawmna hmanpuitu chief minister chuan sawrkar hnathawkte chu, Mizoramin hmasawnna tur resource a neih hrang hrangte a nihna anga hman a nih theih nan hmathlir thui tak nei chunga thawk turin a fuih a.
Chief minister-in ‘hmathlir thui tak’ nei chunga thawk tura a fuih sawrkar hnathawkte hian, Mizoram hmasawnna tur atan hian eng chen nge rilru an pek tih leh; tuna Mizoram dinhmun en hian, Mizoram hmasawnna atana sawrkar hnathawkte thawh dan hi a lungawithlak em(?), tih zawhna pahnih hi a lo piang nghal a.
Sawrkar hnathawkte hi mi tam tak zinga a tha zual thlan chhuah an ni tlangpui a. Department hrang hrangah ‘political fitness’ tia an sawi fo thin hmanga thawktu lo lak nawk nawkte chu awm thin bawk mah se, department tina a khaipa leh a tawlrela tang chinte phei hi chu thiamna sang tak tak nei an ni vek a. Chutiang mithiam rualte chu an thiamna leh finnate hmanga ram leh hnam hmasawnna tura hna thawk tur an ni a, rilru an sengin hah pawh an hah tur a ni a; chutiang avang tak chuan hlawh pawh tha tawk tak mipuiin an pe a ni reng a, hlawh bakah hamthatna dang tam tak an la dawng thei cheu bawk. Mihring nuai 13 vel kum khat chhung enkawlna tur sum ruahmanna budget-ah pawh, a chanve hlawk chu sawrkar hnathawk (mi singnga vel) hlawh atan leh enkawlna atan hman a ni a; kan budget te hi ‘mipui budget’ pawh ni lovin, ‘sawrkar hnathawkte budget’ tih mai awma mawi a ni.
Hetiang khawpa hamthatna nei sang sawrkar hnathawkte hian ram leh hnam hmasawnna tur hian engtiang chiahin nge hna an thawh thin a, eng chen chiaha thahnemngai nge an nih(?) tih zawhna chu tuna kan dinhmun mek hi a chhanna a ni thei ang a. Sawrkar hnathawkte hian tihtakzeta hna an thawh na na na chuan tun ai hian ramin hma a sawn chak phah dawn tih a lang reng a ni.