Sawrkar kalsual thei laka veng turin journalist ngen

Mizoram sawrkar hruaitute chu thil tisual ve thei an nih avang leh sawrkar tha tak a awm theih nan Mizoram journalist-te chu sawrkar kalsual theihna laka venga thurawn pe thin turin Information & Public Relations minister Dr. Vanlalthlana chuan a ngen.
Mizoram Journalists’ Association member-te leh Directorate of I&PR Aizawla officer-te kumthar inhlantharna hun hmanpuitu Dr Vanlalthlana chuan sawrkar veng theitu leh khalhngil thei ber chu opposition party-te leh chanchinbumite an ni tih a sawi a. Ram siamthatna kawngah leh ram vei kawngah journalist-te chuan dinhmun pawimawh an luah tih sawiin, thu lai la thiam taka kal turin a ngen.
Chanchinbumite chu investigate journalism lamah tan la zual tura chahin, tangkai lehzuala RTI hmang thiam turin a chah a. Journalism-a thil thar – data mining leh data journalism chungchangah hmathar lakna tur a awm tih a sawi a ni.
ZPM sawrkar chuan an policy-ah ‘Sustainable Development and Reform’ an dah tih minister hian sawiin, kalphung tharin an kal dawn tih a sawi a. Thil tha apiang an chhawm tur thu leh tih danglam ngai awm an tih danglam tur thu a sawi. Chanchinbumite chu mipui hnena zirtirna pe theitu pawimawh tak an ni, tiin, Zoram siamtha tura theihtawp chhuaha ke pen ho turin a sawm a ni.
I&PR director C Lalnunkima chuan I&PR minister kaihhruaina hnuaiah hmasawnna rahbi thar leh duhawm tak hmuh ngei a beisei tih a sawi a. MJA Gen. Hqrs. president C Lalrambuatsaiha chuan sawrkar hmalakna mipui hnena puanzar kawngah theihtawp chhuah an inhuam tih sawiin, ram leh mipui rawngbawl sak kawnga sawrkar tana mi tangkai an nih theihna hriatsaka hman tangkai tum turin a sawm a ni.