Sawrkar khalh ngil turin hma kan la dawn – MPYCC president

Kumthar atangin ZPM sawrkar khalhngil turin theihtawpin hma an la nghal at dawn tih Congress Thalai president Laltawnliana chuan a sawi.
Ningania Congress Thalai Hqrs hun hmannaah Laltawnliana chuan ZPM party-in MLA 27 neia sawrkarna an siam chu a lawmpui tih a sawi a. Congress party atanga MLA tling awmchhun Pu C Ngunlianchunga chu an lawmpui rualin, tling zo ve ta lo te pawh an tawrhpui tih a sawi.
Mipuiin ZPM-ah beiseina sang tak neia MLA 27 an pek avangin ZPM a lawmpui thu leh chief minister tur Pu Lalduhawma leh a kaihhruai ZPM sawrkar chuan anmahnia beiseina sang tak neitu Mizoram mipui tibeidawng lo tura a duh thu a sawi bawk.
Congress party chu vawi tam inthlan an lo hmachhawn tawhah vawi tam an lo tlak tawh bakah sawrkarna pawh vawi tam an lo chan tawh thu Congress Thalai president hian sawiin, sawrkarna an chan loh avangin an beidawngin an hnual ngai loa, kumthar atangin sawrkar khalhngil turin theihtawpin hma an la nghal at dawn tih a sawi a ni. Congress Thalai general secretray Pu K Lalthanzama Congress Thalai-in candidate an nei chu an lawm rualin, chakna a chang zo ta lo chu an tawrhpui hle tih a sawi.
“Kumin inthlan kan hmachhawn dawn khan Congress Thalai chuan tha leh zung tam tak party tan kan seng a. Kha kan hmalakna kha a thlawn lo a, party tichak tur leh sawrkar khalhngil turin theihtawpin hma kan la chhunzawm zel dawn a ni,” a ti.