Sawrkar lai thawhpui thei tur

Tun hnaia ZPM Thenzawl Block huamchhunga VC candidate tur puannaah bialtu MLA chuan, opposition LC/VC zingah sawrkar thawhpui hleithei lo an awm hian sawrkar hmalaknain mipui a thleng zo lo fo thin a. Hmasawnna hna thawh tak tak dawn chuan sawrkar lai thawhpui thei LC/VC an pawimawhzia a takin kan tawng chho mek, tiin a sawi a.
Kan hrethiam tlang vek a, inthlan hmachhawn hi chuan chak zawk ni tura beih a ngai a, chak kan tum chuan mipui rilru hneh a ngai a, mipui rilru hneh tur chuan hmanrua chi hrang hrang leklam a ngai ve thin.
Hetiang hunah hian mi thenkhat, khingpuite dinhmun tihchhiat nana hmanraw dukdak lo (thudik tawk lo, belhchian nghal mai hleihtheih loh etc.) hmanga mipui rilru tih chiai ching an awm thin a, chu chu tun hmaa ‘politics tuinu’ tia sawi thin zinga pakhat a ni awm e. Tun hnuah hi chuan mipui kan fingvar ve tawh a, social media te a lo chak ta bawk nen, thu belhchian dawl lo hmanga campaign chu tunhma angin a ngamawm ta lo hle a ni.
Tuna ‘sawrkar lai thawhpui thei tur’ tih tawngkam pawh hi, tunhma atanga sawi chhuah hlawh tak, awmze ril tak nei a ni tih chu kan hre vek awm e. Chutih rualin sawi dan azira a lehlam tana beih let nuam tak a ni thei bawk.
Tun tuma bialtu MLA-in a sawichhuah danah hi chuan, ‘opposition zingah sawrkar thawhpui thei lo an awm’ a ti dawt lova, ‘an awm hian’ tiin a sawi a. A hnu lama a sawi zelnaah, ‘sawrkar lai thawhpui thei LC/VC an pawimawhzia a takin kan tawng chho mek’ tiin a sawi zawm leh a. Hetah hi chuan, ‘sawrkar laiin opposition lam thawhpui thei lo tur’ anga ngaih theihin a awm thung.
Hei hi political party tan lam nei chung emaw, kan hma lawk LC/VC election lo awm tura tute emaw hamthatna atana sawi chhuah a ni lo a. Eng party kaihhruai sawrkar pawh ni raw sek sek, mipui sawrkar a ni tawh a, sawrkar bial chu Mizoram state pumpui hi a ni a, Mizoram dinhmun thatna tur, hmasawnna tur ngaihtuah kha sawrkar hna pui ber a ni tawh. Opposition nih vanga hmasawnnain a zuankan deuh tura ngaih theih emaw, rulling lam nih vanga duhsak bik tura ngaih theih tur emawa mipui rilru kawihher/hneh (brainwash) tum hi kan ram hmasawnna daltu tur a ni ang tih a hlauhawm hial zawk a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More