Sawrkar leh Private Hospital-te inkarah ‘Remthu leng rawh se’

Dr. Lalmalsawma Nghaka
Kulikawn

Remna Ni vawi 39-na kan thleng chho der mai a, dama min hruai thlengtu Pathian chungah lawmthu awm sela. Remna leh muanna kan neih theih nan a ram hruaitu, kha tih laia kan rama roreltute, kohhran hruaitute, tlawmngai pawlte leh, mizo mipuite hmalakna kha a ropuiin zahna chibai kan buk nawn e.
He Remna ni denchhen hian MUHCS chungchangah ‘Rem thu leng rawh se,’ i ti teh ang, mipuite kan khawngaihthlak zozai ta.
MUHCS (Mizoram Universal Health Care Scheme) inhnialna nasa tak awm mekah hian a tuartute chu mipui bawk kan ni. Sawrkar pawh inhnuk hniam thei se, Private Hospital thate pawhin he scheme hi beneficiary ten an chhawr ngei theih nan ruahmanna thar awm vat thei se a duhawm hle. Chutiang bawkin Private Hospital lam pawh han fan deuh det theih dante hi a awm em tihte ennawn leh nise, mi awm thei zawkte tan chuan he scheme hmang miah lo pawhin an khawsak a buai lutuk lo pawh a ni thei a. Mahse, mi harsa zawkte hian Damdawi In thaa an khawl neih thatte leh facilities an neih thatte an hman tangkai ve theih nan concessional rate angin BPL family (BPL family tak tak) te tan tal tih dan a awm thei ang em tihte ka rilruah a lang lian hle a ni. Heng Private Hospital-ah te hian MUHCS hman a nihin rate felfai tak bituk sakin a daih loh bill la bangte chu Co-Pay system angin kalpui ta se, mi nawlpui tan a thawventhlak huaiin a rinawm. BPL Families bikte tan sawrkarin an Co-Pay component tur hi subsidize sak dan ngaihtuah bawk se, BPL families te tan chuan jubilee dar kan sawrkar hian a vuaksak a ni dawn a.
Private Hospital-te hi duham lutuk anga chirhthehna a nasa hlein a hriat a. Mahse, Private Hospital-te tana harsatna lai hi ka hriatthiampui hle a. Sum tam tak sengin Damdawi in an din a, loan pawh an la nasa hle ang. Heti hian tehkhin ta ila, dawra thil cheng 100-a kan zawrh thin, chumi atanga tha hah man leh sum lu rulh nana cheng 7-8 hlep kan hmuh ve thinna chu, tu emawin, cheng 50-60 in zuar mai ru rawn tise, sumdawnna leh eizawnna kalpui chhunzawn zel duh tan leh a pung awma sum lu pukte tan chuan dam khawchhuah ngaihna a awm lo ang. Chutiang deuh chu kan Private Hospital-te dinhmun hi a ni. Thawktute hlawh tam tak leh Hospital kalpui nan (a thenah phei chuan hospital hmun luah man thlengin) sum tam tak a ngai bawk si a.
Chutiang zelin, sawrkar hnathawkte hi sawrkar tan an nih leh zual biknaah an welfare-ah hian Sawrkar hian mawh a phur leh zual a. Hei hi an dikna chanvo a ni tlat a, hetianga Mizorama Private Hospital kan neih thate chhawrbawk thei loa an awm ringawt pawh hi a vanduai thlak hle mai. Sawrkar hnathawk pensioner-te pawh an dinhmun a buaithlak phah hle a ni. MUCHS hnuaia beneficiary te hian phai lam hospital an pan a ngaihin, Medical Board kaltlanga referral ngai lova, phai lama MUHCS empanelled hospital an tan a pan awlsam ber leh an tana samkhai ber an pan theih mai dan tura ruahmanna awm ta se a duhawm hle mai.
Sawrkar hnathawk lai mekte hlawh atanga kum khata pawisa he scheme-a lut tura beisei hi Vbch. 26.98 vel a ni a, Pensioner-ten an pension atanga an contribution hi Vbch. 37.10 vel a ni a, Provisional Employees te hlawh atanga an contribution pawh Vbch. 1.68 vel ni tura beisei a ni. A vaiin Vbch. 65.75 vel zet a ni. A nuai bi anga chhut phei chuan nuai 6500 chuang daih a ni. 
Sawrkar hnathawk leh Pensioner ten he scheme atana an hlawh atanga contribution an nei hi a awm viau alawm pawh a tih theih ang a, a dikna chen pawh a awm ang (Sawrkar kal ta ten kha leh chen sawrkar hnathawkte dikna chanvo a ni e tiin an hlawh atanga contribution awm lovin an healthcare bik an lo kalpui kha a ni a). Mahse, he scheme awm hmaa zalen taka an duhna Damdawi Ina an inenkawl theih ang talte khan awm leh thei se an tan a lawmawm dawn tehlul nen, tun ang ringawt hi chuan a theory-ah chuan mitin tan MUHCS hi scheme tha tak angin lang mah se, a tak ramah chuan a kawng a bumboh hle a, ngaihtuah thar a ngai niin a lang a, zau zawka hmalak theih dan awm se a duhawm khawp mai.
Kan sawrkarin thu a chhuahnaah NEIHGRIMS Hospital-ah MUHCS hman theih turin deemed empanelled tih ten a tarlang ngawt nangin, vawiin ni thleng hian MOU an la sign thei lova. India hmarchhak state dangte pawn NEIHGRIMS khu an ban tawm nasa a, an hmang tangkai hle a. State dangte (Nagaland, Arunachal Pradesh etc.) hian NEIHGRIMS te hian MOU an nei fel fai khawp mai a, NEIGHRIMS Hospital te nena inremsiamna fel fai takin NEIHGRIMS ah an state atanga damlote healthcare etc. buaipui turin Counter felfai tak an nei thlap a ni. NEIGHRIMS dinhmun ang bawk hian MUHCS hnuaia phai lam  empanelled hospital an tihte hi MOU an ziak felfai em tih hriat a chakawm hle a ni.
Matthaia 5:9 - “Remna siamtute chu an eng a thâwl e; Pathian faa vuahin an la awm dâwn si a.”