Sawrkar leikhawm sa sawhthing MT 88 vel hralhchhuak leh tawh

Mizoram sawrkarin kuthnathawktute atanga sawhthing a leikhawm sa, kudam-a a dah khawm metric tonn 1997 atangin MT 88 vel chu hralhchhuah a ni tawh.
Mizoram Agriculture Marketing Board chairman, minister PC Vanlalruata’n Assembly Session-a a sawi danin, sawrkarin thlai thlan bik pali a lei tur chingtuten tun thlengin primary society 678 a ding tawh a; heng ho khaikhawmtu secondary collection centre (SCC) hi sawhthing bik atan 62 a ding tawh a, hmunphiah bik 8 a ding tawh a, din belh zel ala ni.
SCC hrang hrangah hian sawhthing quintal 14300 vel phurhkhawm a ni tawh a, buffer godown-ah metric ton 1997 phurh thlen a ni tawh a, heng zinga MT 88 vel hralh tawh niin, hralh mek zel a ni tih a sawi.
“Buyer-ten sawhthing an lei tur hi kudam-ah kan endik tir vek a, an duh zawng a nih leh nih loh kan zawt a, an duh ang quality ngei an lei tih hming an ziahhnan hnu ah kan leitir chauh tawh a ni,” MAMB chairman hian a ti.
Member-te zawhna chhangin Agriculture minister PC Vanlalruata chuan, sawhthing man hi India ram chhung leh pawn lam thlengin nitin a che reng a, tunah hian kg ah Rs.33, 34, 35 chho a ni a, kum kalta lam nena chhutin, sawhthing rate hi April chho velah a sang deuh tura ngaih a ni tih a sawi. “Hemi hun hi nghak hram hram a, lo cho lawk vak vak lo turin a chingtute kan inhrilh reng a ni,” a ti.
Tunhnaia Reliance lamin farmer producer organisation kaltlanga an lei, Sailam leh Chamring khuaa sawhthing pawh an hnualsuat reng reng loa, an la zel dawn tih a sawi a ni.
Kuthnathawktute sawhthing an leisak hi support price an pe a, kumin June thlenga lei tura an tih chu, duh anga lei leh hralh zung zung theih a nih loh avangin ZPM Legislature Party thukhawm chuan hun bituk ruat hi hlipin, an leisak chhung zawng support price pek an tum tih MAMC chairman hian a sawi bawk.