Beer nge tha zawk whiskey!

Beer nge tha zawk whiskey!
Zu hi hriselna atan a tha lo. Mithiam te chuan zu in aiin in miah loh hi hriselna atan a tha daih zawk niin an sawi. Chutihrualin a in lo thei lo hi khawvelah maktaduai tam tak an awm lawi si a. Zu lam chi-ah chuan beer leh whiskey hi hriatlar ber leh in-tu tam ber niin an sawi a. A eng hi nge tha zawk tih thu a Times of India health section chhui zauna kan rawn tarlang e.
Beer-ah hian a tlangpui thuin a alcohol content hi 4-6% a ni thin a, a tak loh zawk (lower strength) avangin a inte hian an in tam deuh tlangpui. Whiskey-ah ve thung hi chuan a alcohol content hi 40% emaw, a aia sang hret emaw a ni tlangpui a, tlem in pawhin a thawk chak zawk thin.
Mithiam te chuan beer emaw whiskey emaw pawh ni se kan in lo thei lo a nih pawhin in tam loh tur an ti. Whiskey hi a chak zawk avangin a in thin te pawhin an in tlem zawk tlangpui a, beer erawh a in thin ten an in tam tlangpui a, a chawhruala an zu in (alcohol intake) a sang duh zawk a ni.
Beer-ah hian carbs leh calorie a sang a, beer pint khat (litre chanve vel)-ah hian 150-200 calorie vel awm angin an chhut a. whiskey hi beer nena khaikhin ralah chuan carbs leh sugar a tlem zawk a, 30ml-ah 70 calorie vel awm angin an chhut ve thung a, whiskey-ah chuan carbs awm lo, calorie a tlem zawk bawk a nih chu. Chuvangin beer in tam te chu an thau duh zawk tihna a ni.
Lung (heart) lamah engtin nge nghawng a neih? Beer-ah hian polyphenols leh B vitamins a awm a, chu chuan cholesterol tha chi (HDL) a tisang thei a, chu chu lung tan a tha niin an sawi. Whiskey-ah chuan ellagic acid a awm a, chu chu antioxidant chak tak, oxidative stress leh inflammation tihniam thei a ni ve thung.
Times of India tarlan dan chuan beer leh whiskey te hian lung tan thatna eng emaw chen chu an nei ve ve a, mahse, whiskey-ah hian antioxidant a tam avangin a tha zawk a ni. Mahse, heng a thatna ni a an sawi pawh hi damdawi anga hman a, tlem tlem a in chauhin a thatna a awm a, rui khawpa in fo chuan a thatna a awm leh chuang lo!
Thin (liver) eng tan eng nge tha zawk? Beer in thin chuan khuareiah an zu lak luh a lo tam zawk nge nge a, whiskey erawh a chak zawk avangin zu lak luh a lo tlem zawk thin a ni. A eng zawk zawk pawh ni se zu in tam hrim hrim hi thin tan a tha lo ve ve a ni.
Beer-ah hian probiotic leh fiber a awm niin an sawi a, chu chu pum tan eng emaw chenah a thatna a awm thei. Chutih rualin pum a tipuar lung duh ve thung. Whiskey-ah hian carbs a awm lo a, gluten a awm lo bawk a, in tam loh chuan beer aiin digestion a tibuai lo zawk.
A eng chu nge tha zawk? Eng lam hawi emawa zirbingna neite chuan zu thatna eng eng emaw hi an sawi fo ang, mahse, zu chu eng chi pawh ni se a thatna aiin a that lohna a tam zawk zel a ni. Oxidative stress leh inflammation a siam a, cancer chi hrang hrang a thlen thei a, thin (liver) a tichhe thei bawk. Chuvangin zu chu in loh a tha ber a, kan in lo thei lo a nih pawhin tlem tlema in chauh tur a ni.