Sawrkar ngelnghet din theih lohnaah sawrkar din tum mek
Sawrkar ngelnghet din theih
lohnaah sawrkar din tum mek
Chakma Autonomous District Council-ah sawrkar ngelnghet a din theih loh avangin Governors’ Rule-ah an awm mek a, ZPM party chuan sawrkar ngelnghet an din theih thu larsap an hrilh.
11th Chakma Autonomous District Council hi 2023 May 9 khan inthlanpui neih niin seat 20 awmnaah BJP-in seat 5, MNF 10, INC 5 thlantlin an ni. Seat la tam ber MNF leh party dang atanga lutten sawrkarna siamin 2023 May 25 khan chief executive member atan MDC Rasik Mohan Chakma chu lakluh a ni. 2024 December 11-ah he sawrkar hi No Confidence Motion hmanga paihthlak niin, 2025 February 4 khan Molin Kumar Chakma chu 11th CADC-a CEM pahnihna ni tura lakluh a ni. 2025 June 16 khan Molin Kumar Chakma hi CEM atanga paihthlak leh niin, sawrkar mumal tak a awm theih tak loh avangin 2025 July 7 khan thla 6 chhung atan CADC chu suspend a ni a, Governors’ Rule-ah awmin Lawngtlai district bawrhsap chu CADC sawrkar enkawl lailawk tura tih a ni.
Hetianga sawrkar tur an inteltual chhung hian ZPM chuan party hrang hrang MDC atangin MDC 16 a nei tawh a. Sawrkarna an siam thei tih 2026 January 7 khan, Autonomous District Council bika thuneitu sang Mizoram larsap an hrilh.
CADC sawrkar sumin Governors’ Rule-a awm reng a tlin tawh loa, hmasawnna hna pawh theih ang anga thawh chhoh niin, sawrkar ngelnghet a din a tul hle tawh tih larsap hi an hrilh a. Sawrkarna an siam theih thu an thlen chu pawmpui turin an ngen.
ZPM MDC-te hian District Council & Minority Affairs minister C Lalsawivunga pawh hmu in 11th CADC-a ZPM MDC-ten sawrkar nghet leh langtlang siam turin an inpeih a, CADC suspend a nih hun chhung a tawp tep tawh avangin larsap hnena thlenpui turin an ngen bawk.
ZPM Media Department chairman B Lalchhanzova chuan thuthar thehdarhtute a kawmnaah CADC-ah ZPM sawrkar a din theih thu larsap hnena an thlen thu sawiin, CADC-ah mipui sawrkar mumal tak a din theihnan hma la thuai turin an ngen tih a sawi.
ZPM Media chairman chuan, CADC-ah MDC elected member 20 awm zingah ZPM chuan MDC 16 an nei tih sawiin, sawrkar puitling a pian ngei theihnan ZPM chuan theihtawpin hma a la dawn tih a sawi a ni.