Sawrkar sikulah lehkhabu sem dawn

District Education Officer office Khawzawlin sawrkar sikul-a a thlawna sem tur lehkhabu chu Thawhlehni tuk khan district bawrhsap K. Lalrohlua’n a vailiam.
Block Resource Center coordinator PC Rosiama sawi danin, zirlaibu hi Khawzawl district-a sawrkar enkawl leh aided elementary school tan pek a ni a. An district chhungah sawrkar enkawl primary school 40 awmin, heng school-ah hian zirlai 1586 (mipa 870, hmeichhia 716) an awm. Middle school 36-ah zirlai 1479 (mipa 774, hmeichhia 705) an awm a; sawrkar school-a zirlai awm zawng zawng hi 3065 an ni a, an zavaia indaih tur subject kimin pek chhuah theih a ni.
Hei bakah hian pre primary school/ balvatika-ah pawh Early Childhood Care and Education (ECCE) Fund atangin zirlaibu pek a ni a. Kumin atang hian NEP 2020-in a phut angin pawl 1 zirlaiten thla thum chhung chu an zirlaibu zir loin, ziak leh chhiar leh chhiarkawp bulthut an man theih nan ‘Zirna Kailawn’ bu an zir phawt dawn a ni.