Sawrkar tan YMA hi kan inngahna – Prof. Lalnilawma

Sawrkar tan YMA hi kan inngahna
– Prof. Lalnilawma
YMA chu sawrkar tan innghahna leh thlamuantu; kohhran nen pawh mihring nun siamthat kawnga tha thawhtu a ni tih minister Prof. Lalnilawma chuan a sawi.
YMA Seling Branch chuan Ningani khan an kum 50 tlin, Golden Jubilee an lawm a. Tawi bialtu MLA, minister Prof. Lalnilawma hian hmanpuiin, YMA chu Zofate tana hnam rohlu a nih thu leh sawrkar leh YMA in ram siamthatna kawnga thawhdunna tha tak an nei chu lawmawm a tih thu a sawi.
YMA-in thiltum hmangin khawtlang leh ram tan nasa takin hna a thawk a; kumpuan neiin zirna kawnga thalaiten hma an sawn theihnan hma a la a, kohhran nen lungrual takin mihring nun siamthat kawngah tha an thawh a, ram leh hnam humhalh kawngah YMA-in a thawh hlawk hle tih minister hian a sawi.
“Sawrkar tan pawh YMA hi kan innghahna leh min thlamuantu a ni a, tuihna humhalh kawngah PHE department puitu niin, nasa takin ke kan pen a, ruihlo do kawngah leh hnam ziarang chawinun bakah kawng hrang hranga sawrkar leh YMA in thawhdunna tha tak kan nei hi thil lawmawm tak a ni,” a ti.
Kan ram mipuiin hunawl hmanthat kawngah hmasawnna tur kan ngah hle tih Prof. Lalnilawma hian a sawi a. A bikin thalaite hunawl hman that kawngah harh thar se a duh hle tih a sawi.
Zirna, hriselnam eizawnna leh hmasawnna hna thawh kawnga sawrkar hmalakna chu YMA-in hriatpui a, sawrkar tha tichaktu ni zel turin a beisei tih a sawi bawk.
YMA Seling Branch hi kum 1974-a din a ni a, a hnuai atang hian branch hrang hrang an lo indang tawh a, tunah hian YMA member 1047 an awm mek.