Sawrkar tha kalpui dan tur sawi

Sawrkar tha kalpui dan tur sawi
District Level Committee on Good Governance Saitual chu an chairman, district bawrhsap Dr Lalngura Tlau kaihhruaiin Thawhlehni khan an thukhawm.
Chairman chuan DC office-in Mizoram Public Service Delivery Act hnuaiah service chi hrang hrang 21 chu mipuiin an dil thei a. Heng hi office-ah mipui chhiar theiha tarlan a ni tih a sawi. Department dangte chu mipuiin eng service nge an pek theih tih hriatna atan an office theuha tar turin a ngen a ni.
Good governance-in a tum pawimawh chu mipui tana awlsamna siamsak a nih angin, hmalakna chu mipui kawtkaia thlen (doorstep delivery) ti thin turin a fuih a. Department hrang hrang hotute chu hemi kawnga hma an lakna DC office-a hriattir zel turin a hrilh. Right to Information Act hmangin mipuiin sawrkar department hnuaia an hriat duh leh zawhna an neih apiang an zawt thei, tiin, RTI Act hmangsual a midang kheina atana hmang thin an awm erawh thil pawi tak a ni tih a sawi a ni.
Thutkhawmah hian district administration hotute leh department hrang hrang hotute an tel.