ZPM chuan election campaign lai khan sawhthing lei dan tur chungchangah minimum support price Rs 50/- per Kg an sawi ri a, grade A leh B lam sawi rik a ni lo. ZPM party chu sawrkarna siam thei turin hneh taka thlan tlin a ni ta a; thlai thar lei an tawktarh chu an tlin chhan zinga a tlar hma luahtu a ni a, thlai thar lei tur zingah rau rau pawh sawhthing chuan hmun a luah sang ber ang a, ‘Sawhthing hi ZPM tlin chhan bulpui ber a ni’ a tih theih hial awm e.
Sawrkarna an chelh atanga thla ruknaah agriculture minister-in press conference a ko a, chutah chuan Grade ‘A’ sawi rik a ni a, “….Rs 50 tih hi Grade ‘A’ sawina a ni tih hi chiang fek fawkin kan sawi duh…” tiin Dr. KC Lalmalsawmzauva, Adviser to Chief Minister chuan a sawi a. Grade ‘A’ chungchang sawirik a nih atanga thla khat hnu velah social media lama sawi zui a hlawh chhoh tak avang leh, political party thenkhatin thuchhuah hial siama an bawhzui tak zel avangin, chief minister chuan sawhthing lei leh hralh chungchangah Grade A leh B a awm loh tur thu ZPM Gen Hqrs general secretaries te a hrilh tih chu mipuiin chanchin thar lama kan hriat dan a lo ni leh ta a ni.
Sawhthing chungchanga thil kal dan han thlir hian, research based-a kal inti sawrkar thu hi a nawi deuh em aw, a tih theih awm e. Adviser to Chief minister meuhvin sawhthing Grade ‘A’ chungchang a sawi chhuak a, a sawi chhuah atanga thla khat chuang hnuah, chief minister berin sawhthing grade A leh B a awm lo, a ti leh si a. Sawrkar thu mum a awm thei lo a nih chuan, ngaihngam takin kuthnathawktute hian sawrkar thu hi an ngaithla thei tawh lo mai ang tih te pawh a hlauhawm a. Hetiang a nih chuan, sawrkar rin tawk lohna ‘motion’ hi mipui lam hian an pu lut reng mai ang tih te pawh a hlauhawm hlel lo a ni. Chuvangin, sawrkar hian thu a puanzar tur chu ‘chiang fek fawka’ a sawi hmain chiang takin ngaihtuah thin tawh se a duhawm hle a ni.
A lehlamah chuan, sawrkarin sawhthing hi Grade A&B emawin thliarin thliar lo mah se, Mizote hian kan moral Grade hi kan tihsan a ngai hle tih erawh zep thu a cheng lo. Tunhmaa rubber hmanga sumdawnna boruak kan hre tawh a, kha rilru kha tun thleng hian kan la thanhnan deuh roh niin a lang a. Sawhthing hralh turte pawhin, sawhthinga lei (soil) bet leh kai liai luai emaw, berh liai luai emaw chunga hralh talh tum lo se, anmahni pawhin an ei duh tur ang zana fai thain sawhting hralh tum se, sawhthing quality tha, a hralhtu rilru quality tha bawk, ‘Mizote chu hnam rinawm an ni, an zingah thil a bo ve thei lo’ tia tunhmaa kan pi leh puten hnam quality an lo siam ang khan, sawhthing hmang hian hnam nun mawi leh hlu ang kha chawi nun i tum leh zawk ang u khai.
Sawrkar thu a nawi deuh em?!
Get real time updates directly on you device, subscribe now.